٣ حروف سحرية

[walaa farouk]

ف و ت ، كلمة ممكن تحل اغلب ان لم يكن كل مشاكلك مع نفسك
و مع مخك و مع الناس ..

طبعا فيه حاجات ما ينفعش تتفوت، و دي نادرة الندرة ،
و استثناء الاستثناء بالذات ما يجرح كرامتك
او يدوس حقوقك و حقوق اهل بيتك ..

إنما في الأغلب الاعم "فوت" ترتاح ..

فوت الكلام و ما تقفش للناس عند كل كلمة ..
لمح من بعيد و انت مبتسم ممكن
، إنما تقعد تشيل و تحط و تراجع للناس كل هفوة و كل حرف
، و تعاتب في الفاضي و المليان،
ح تخسر راحتك و تخسرهم و تطفشهم منك
و ح تلاقي نفسك في الآخر لوحدك محشور مع عقلك
في "نفق زعل " ما لوش اول من آخر !!

سايس عقلك ، و وقف لسانك و عتابك و زعلك ..
فوت للناس يحبوك و يصلحوا نفسهم معاك ..
ممكن من وقت للتاني " لو جت فرصة "
و اتزنقت و اضطريت تتكلم ، ارمي كلام من نوعية "انا عارف انك ما تقصدش" ، "
انا عمري ما ازعل منك" ، انت غالي و الغالي ما حدش يزعل منه" ..

إنما تقضي حياتك زعل و قمص و عتاب و حساب ، تتعب قوي و تتعِب اكتر ..

فوت علي عقلك الزعل ، الدنيا مش مستحملة ..
و فوت علي علاقاتك الزعل و الحساسية
اللي ممكن يقلب خصام و قطيعة ..
و فوت علي عدو الخير عكارة المشاكل
و عكننة التحاملات و "التكويم" و التخزين ..

علي قد ما تفوت كتير ، علي قد ما تفرح كتير..