انسانه بتغلط ومَش مثاليه ( انا مَش ملاك )

[Mary Naeem]

انا مَش ملاك

انا انسانه طبيعيه ليا عيوبي و ليا مميزاتي ، اوقات بغلط و مبتكسفش اعتذر ، و اوقات بساعد اللي حواليا و اوقات مبقدرش بكون مش قادرة او معنديش طاقة .

بحاول اكون واضحه لكن سعات بفشل و حبي ليك او زعلي منك بيبان في تصرفاتي و عنيا .
انا طفله بلعب و اجري و اتقمص ، و اوقات كتير بتفلسف .
بتكلم في اللي اعرفه و بدافع عن افكاري و لو حطيت حاجه في دماغي بتعلمها بس واثقه اني مَش هاقدر أتعلم كل حاجه ، يعني مثلا مقدرش اكون جراحه او دكتوره سنان و لا حتي ابني مبني .

زمان حلمت اكون مهندسه و دكتوره و اعلاميه و مدرسه و حتي حلمت اكون ام .
لكن كل ده كنت بدور علي نفسي و لسه بدور عليا وفهمني .
فَلَو فيوم فكرت اني خلاص وصلت و فهمت نفسي هكون بعيد و لسه موصلتش .
الحياه مليانه مشاكل مَش مستاهله نخلقها هيا موجوده لوحدها.
و للاسف هتفضل كده و مَش هنوصل للسعاده الابديه الخاليه من الهموم .

هنقابل ناس مختلفه كل يوم ناس هنالفهم و هيالفونا ، و ناس هيشفونا بنمثل مَش حقيقين .
محدش هيقدر يعرفك غير لما يكون بيحبك ، اللي بيكرهك اكتر واحد مَش عارفك ، علشان كده بلتمس الأعذار للناس و بحب ابات مظلومه ولا اني اظلم حد .

الحقيقه دايما مبتكنش واضحه لازم تدور عليها وصباعك لما يبطل يشاور علي كل اللي حواليك و تبدا في نقد و تقويم نفسك ، ساعتها بس ممكن تعرف اكتر عنها حجات مكنتش تتخيلها ، هيبان ضعف و هيبان قوه .
مقدرش أقول اني عرفتني ١٠٠٪؜ بس اللي انا متاكده منه اني( حقيقيه )،
انسانه بتغلط ومَش مثاليه .