باصين لهم في اللقمة

[walaa farouk]

مش بس باصين ، ده مبحلقين، و حاقدين ، و بيعدوها عليهم و نفسهم ياخدوها منهم و ياكلوها كلها ..

و من كتر الغيظ ، ماعندهمش غير الموضوع ده يفكروا فيه : كل واحد عنده ايه مش عندي ؟ و ازاي هو يبقي عنده و أنا لأ ؟؟ و ليه ربنا اداله و ما ادانيش؟؟

و فاكرين كده انهم ح يكسبوا، و ان اللي حواليهم ح يخسروا !!

و الحقيقة ان ربنا هو اللي بيوزع النجاح و الأرزاق، و ان كل واحد له من تعبه نصيب ، و ان تساوي الانصبة ده مستحيل لاختلاف البشر و حكمة الله..

و الحقيقة التانية ، ان كل ما تحقد علي حد رزقك انت اللي بيقل ، لان الله يمنعه عن الحاقدين و يفيض به علي الشاكرين الفرحانين بنجاح غيرهم ..

و الحقيقة التالتة ، حقد الناس عمره ما ح يؤثر في ارادة الله لنجاحك و توفيقك ، بالعكس : اوعي تزعل او تتضايق ، لان كل ما يتعبوك ربنا يفيض عليك من خيره أضعاف..

و رغم حقد شاول علي داود و غيرته منه و حربه ضده "كَانَ دَاوُدُ يُفْلِحُ أَكْثَرَ مِنْ جَمِيعِ عَبِيدِ شَاوُلَ، فَتَوَقَّرَ اسْمُهُ جِدًّا. (صموئيل الأول ١٨: ٣٠)