متدين و ملحد

[walaa farouk]

اوعي تستقل أو تحتقر ملحد..

كل واحد مر بلحظات صراع و الم خلت إيمانه يمر بعواصف عاتية ..

و بحب عميق و إجابات شافية و احتواء حقيقي و ابوة حقيقية ،
طلع من أفكاره و صراعاته لشاطيء الإيمان بثقة اعظم ..

الملحد مش كافر و لا شرير و لا فارغ العقل .
. هو انسان فكر و احتار و شك
و ما لقاش حد يحتويه و يصبر عليه
و يحترم وجهة نظره و يقدر صراعاته..

الملحد ياما اصطدم بحد متدين لفظه و كفره و شتمه و طرده
، فازداد الحاده، و ازداد نفور من ناس قلبها ضيق
و حبها غايب و عقلها متزمت..

الملحد ما لقاش حد يحبه زي ما هو
، زي ما السيد المسيح احتوي السامرية و العشار و الفريسي
و نيقوديموس ، و اداهم وقت و صبر و حب،
و ناقشهم و احتملهم و قبل اختلافهم
و حتي هجومهم و تصفيتهم، و كسب قلبهم قبل عقلهم ..

الملحد بيفكر و يناقش و عاوز قلب يحتويه و عقل يحاوره ..

و مرات كتيرة المتدينين الشكليين -للاسف- بيبقوا السبب في انتشار الإلحاد !!