ما تبوظش الطبخة علي شوية ملح

[walaa farouk]

علي رأي المثل المبدع "ما تبوظش الطبخة علي شوية ملح" ..

من أمثلة كده علاقة تتفشكل علي شوية فلوس تافهة، و نقف قدام بعض
، و انت قلت و انت قلت ، و اتفقنا ، و ماينفعش كده ،
و الكلام يزيد و التراشق بالألفاظ، و بعدين العلاقة تتقطع..

شوية "ملح" اقصد كام جنيه يحلوا المشكلة ، و تبقي اشتريت راحتك و راحة الناس بذكاء..
و بعدين يا سيدي أسوأ الفروض ما تبقاش تتعامل تاني معاه ماديا،
او خللي اتفاقاتك لو ضرورية بطريقة تانية..

مشكلة مع ناس و خلافات و كلام رايح و مش راجع، و تفاصيل و معارك..
و شوية "ملح " يحلوا الموضوع، كلمتين تواضع علي حقك علي
علي زعلك غالي علي ما اقدرش ازعلك، مع ضحكتين حلوين من القلب الموضوع يخلص
.. و شوية ملح اقصد "حب علي تواضع علي حكمة"
يخلصوا الموضوع .. و بعد كده ابقي خد بالك معاه، و خد حذرك في الكلام و المعاملة ..

موضوع مطلوب فبه رأيك، و الصراحة جارحة، و يا ما بسببها خسرت ناس
و كسبت معارك .. حط علي رأيك شوية "ملح "
من الحكمة و الكياسة و الأدب و الإيجابية، و قول رأيك بين كلمتين تقدير،
تكسب الناس و يحبوك و يسمعوك..

افتكر الآية الخالدة : "ليكن كلامكم كل حين بنعمة،
مصلحا بملح، لتعلموا كيف يجب أن تجاوبوا كل واحد" (كولوسي ٤ : ٦)