زوجتي المستقبليه ..
حبيبة عمري اللي جاي ..
مساء الفل علي عيونك ..
حبيت اكتبلك من دلوقتي .. وانا لسه مش عارف "اسمك" ولا "شكلك" ولا عارف هنتقابل امتي .. احب اعرفك اني مستنيكي من سنين .. قافل علي قلبي علشان خاطرك .. وبرغم اني اوقات كتير بحتاج لوجودك جنبي .. بحتاجلك بنت تكملني و تسندني و تشاركني تفاصيل حياتي .. الا اني عمري ما خنتك .. بحافظ علي قلبي علشانك .. ومبدخلش ف اي علاقه تستنزف مشاعري .. وكأني بحوشلك كل الحب اللي ف قلبي و كل التفاصيل الحلوه اللي هتتعاش معاكي وبس 💝
حبيبتي اللي لسه معرفهاش ..
انا عارف انك برضه مستنيه اليوم اللي هنتقابل فيه .. اللحظه الدراميه اللي عيونك هتحضن عيني وتقولي "كنت فين من زمان" .. يمكن تكوني دلوقتي بتدوري عليا .. ف كل مكان بتروحيه .. ويمكن تكوني محتاجه لوجودي جنبك النهارده قبل بكره .. بس الأكيد اننا مسيرنا هنتقابل .. ف الوقت والمكان اللي ربنا محدده من قبل الزمان بزمان .. ولحد ما نتجمع صدفه .. انا هفضل ادعي واصليلك
وهفضل مستني اعيش معاكي وليكي التفاصيل دي :
مرحلة الاستهبال والاستعباط اللي بتسبق الاعتراف بالحب _ غيرتك عليا من كل صحابي البنات _ خروجاتنا سوا وحضن ايديا لايديكي واحنا بنعدي الشارع _ لحظة ما اقولك قدام اهلك وصحابك "تتجوزيني" _ نظرة عيونك ليا وانتي ب فستان الفرح _ خجلك وفرحتك البريئه وانتي بتقوليلي يا حبيبي انا حامل _ خناقتنا واحنا بنختار اسم اول طفل لينا _ سهرك بالليل معايا وانا بخلص شغل و لماضتك عليا _ خصامك ودلعك عليا من غير سبب علشان اصالحك ب مفاجأه _ مشهد وجودك جوه حضني ف وقت تعبك _ فرحتي بنجاحك ف شغلك _ اول خصلة شعر بيضا ف شعرك _ لما تيجي بنتنا تحكيلك عن اول قصة حب ليها وتفكرك ب ذكريات زمان بيني وبينك _ فرح ولادنا _ قعدتنا مع بعض لوحدنا بعد سنين وسنين متعكز عليكي و مسنوده بيا واحنا بنتفرج علي البوم صورنا .. و ساعتها اقولك اني لسه بحبك .. بحبك زي زمان وأكتر
13 - 05 - 2017, 07:39 PM
رد: زوجتي المستقبليه
العرض العادي
