ياعم فكك ده كلام وعظ

[walaa farouk]

من الحاجات اللي انتشرت جدًا مؤخرًا بيننا هي جملة:
"بلاش وعظ".
يعني إيه؟ يعني كفاية كلام نظري،
انزل معانا على أرض الواقع، شوف الدنيا ماشية إزاي.
اللي بتقوله ده كلام حلو، بس ملوش علاقة بالحياة اللي بنعيشها،
مش زمنه، ومش نافع.
بقينا نشوف ربنا كأنه إله نظري، كلام حلو بيتقال في الكنيسة،
وصايا جميلة بتتعلق على الحيطان، لكن مين يقدر يعيشها؟
إحنا في زمن غير اللي اتكتب فيه الكلام ده.
لكن.. هل فعلًا الله نظري؟
هل فعلًا وصاياه صعبة؟
ولا إحنا اللي بعدنا عنه، فبقت الحياة معاه شكلها تقيل؟
الكتاب المقدس بيقول بوضوح:
"فَإِنَّ هذِهِ هِيَ مَحَبَّةُ اللهِ: أَنْ نَحْفَظَ وَصَايَاهُ.
وَوَصَايَاهُ لَيْسَتْ ثَقِيلَةً" (1 يوحنا 5: 3).
وصاياه مش تقيلة، مش لأنها سهلة من بره،
لكن لأن لما باحبه، ولما باعيش معاه بجد، قلبي بيتغير،
وطبيعة تفكيري بتتجدد. مش هابطل الخطية
علشان دي وصاياه وبس،
لكن علشان جوايا في حاجة بتتغير…
بقيت فاهم إن الخطية مش كسر قانون،
لكن حالة موت، وأنا مش عايز أعيش ميت.