لو خسرت سلامك الداخلي عمرك ما هتعرف تدي سلام لحد

[walaa farouk]

– كل يوم بصحى ألوم نفسي..
= على إيه؟
– على كل حاجة حتى الحاجات الصغيرة..

العلاقة المسمومة مش دايمًا بتبقى مع الناس.
.ساعات بتكون مع نفسك..
لما تتحول من أكبر داعم ليك لأكتر ناقد قاسي عليك..
تلاقي نفسك مش بترحم نفسك:
كلمة غلط قرار ناقص حتى لحظة ضعف..
بتتحول "لشاكوش" جلد ذات بتضرب بيه طول اليوم..

المشكلة إنك لازم تستوعب إن جلد الذات مش بيصلح..ده بيكسّر..
النقد الصحي يقولك: "أنا محتاج أتعلم وأتغير."
لكن العلاقة المسمومة تقولك: "أنا فاشل ومش نافع."
الفرق بينهم هو الفرق بين النمو والانهيار
..بين محبة الذات وكرهها..

الحقيقة إن نفسك محتاجة نفس الحنية اللي بتديها للناس:
لما صديقك بيغلط بتواسيه..
لما حد بيقع بتشجعه يقوم..
طب ليه نفسك محرومة من نفس المعاملة؟

اعرف إنك مش عدو نفسك أنت صاحبها..
وكل مرة بتحتوي ضعفك بدل ما تجلده
بتدي لنفسك فرصة تنضج وتكبر..

الخلاصة؟
ابدأ ابني علاقة صحية مع نفسك..
علاقة أساسها الصراحة والرحمة..مش العداء والجلد..
لأنك لو خسرت سلامك الداخلي عمرك ما هتعرف تدي سلام لحد..