ليه شايل هم بكرة؟

[walaa farouk]

ليه شايل هم بكرة؟
هو ربنا قصّر معاك امبارح؟
هو نسيك؟ سابك؟ ما وقفش جنبك وقت ما الكل مشي؟
ده انت لو رجعت تبص على كل الأزمات اللي كنت مفكر إنها نهايتك…
هتلاقيه هناك، في كل لحظة، كان بيلمك ويعديك.

انت خايف من بكره ليه؟
من حاجة لسه مجتش؟
ده يمكن الحاجة اللي خايف منها
هي نفسها هتكون سبب الفرح اللي مستنيه من سنين.

بص حواليك… انت هنا، عديت حاجات كتير،
واللي خلاك تعدي ده كله،
مش هيكملك الطريق؟
هو مش قالك: “أنا معاكم كل الأيام”؟
مش قالك: “لا أهملك ولا أتركك”؟

فماتقلقش من بكرة،
لأن اللي معاك… هو اللي خلقه.
واللي خلقه، ضامنه.