لما قعدت معاه لوحدنا

[walaa farouk]

لما قعدت معاه… لوحدنا
ومن غير ما أظبط كلماتي ولا أرتبها.
كنت عايزة اتكلم..ويمكن كنت عاوزه أتطمن..
محتاجه شوية هدوء وسلام..مش عارفه!
قُلتله:
يارب أنا قلبي مشتاق للي ما بيتغيرش.
مشتاق لحضن مش مؤقت، ولا مشروط.
تعبت من اللي بيروح بسرعة، من الكلام اللي بيتنسي،
من الناس اللي بتغيّر وشّها، ومن الضحك اللي بيغطي الوجع.
قلتله: نفسي أعيش في مكان مافيهوش وداع، ولا خوف، ولا احتياج مش مفهوم.
نفسي أعيش في النور اللي مايعتمش، والفرح اللي ما يتخطفش،
والسلام اللي ميروحش مني ابداً.
قلتله: أنا مش بدوّر على حاجه غيرك بدور علي حبك رغم انه حواليا
بدوّر على حضنك اللي منه جيت، وهرجعله
واللي قلبي دايماً بيشتاقله
وبعد ما خلصت… ماردش بكلام كتير.
هو قاللي جملة واحدة… بس كانت كفاية:
“كملي رسالتك وأنا معاكي..مستنيكي بفرح
ومجهزلك مكان..عشان تكوني معايا، للأبد.”
"وَإِنْ مَضَيْتُ وَأَعْدَدْتُ لَكُمْ مَكَانًا آتِي أَيْضًا وَآخُذُكُمْ إِلَيَّ،
حَتَّى حَيْثُ أَكُونُ أَنَا تَكُونُونَ أَنْتُمْ أَيْضًا،" (يو 14: 3).