ربنا يعوضك بتلات اضعاف

[Mary Naeem]

كنت رايح الشغل عند مدخل شارع الفجاله كدا ، بعد مانزلت من الميكروباص لاقيت ست بتقولى جعانه يولدى ادينى حاجه اجيب بيها ساندوتش فول حتى ، انا من عادتى لما بمشى فى الشارع مابسمعش لاى حد بيكلمنى لكن حاجه جوايا دفعتنى انى اقف للست دى ، قولتلها حاضر ، وروحت عند عربية فول قدام القهوه اللى هناك جبتلها ساندوتشات ، وجبت لنفسى فطار وروحت عطتهملها ودعتلى دعوه حلوه قوى ، قالتلى روح ربنا يعوضك بتلات اضعاف 🙏.. فرحت جداً وروحت الشغل لكن هناك اكتشفت حاجه غريبه جداً ، لاقيت وقعت منى ٢٠٠ جنيه وغالباً وقعت منى لما كنت بشترى ساندوتشات ، لحظتها ضحكت باستخفاف كدا وقولت هو ده التعويض ، شكراً يارب ..
الفكره بقى ان دى ال٢٠٠ جنيه الوحيده اللى كانت معايا ، والفيزا كنت ناسيها فى البيت ومش عارف هاروح ازاى ؟؟
لكن حصلت حاجه ماكنتش متخيل خاااااالص انها تحصل ..
جانى مديرى وعطانى ظرف وقالى مبروك 🥳 ،
كان فى مسابقه فى الشغل طلعت فيها التانى وكانت المكفأه ٦٠٠ جنيه ، افتكرت ساعتها كلمة الست لما قالتلى ربنا يعوضك بتلات اضعاف ..😊🙏
عزيزى القارىء

"اِرْمِ خُبْزَكَ عَلَى وَجْهِ الْمِيَاهِ فَإِنَّكَ تَجِدُهُ بَعْدَ أَيَّامٍ كَثِيرَةٍ."
(جا 11: 1).