بتتكلم عن ربنا أكتر ما بتتكلم مع ربنا؟

[walaa farouk]

بتتكلم عن ربنا أكتر ما بتتكلم مع ربنا؟
عندك وقت للخدمة ومفيش وقت للصلاة؟
بتجهز اجتماع ساعات طويلة لكن مش لاقي خمس دقايق للإنجيل؟
زعلان لو حد ما شكركش؟
متضايق لو اسمك ما اتذكرش؟
بقيت تخدم بقوة العادة مش بحرارة الحب؟
ساعتها لازم تقف وتسأل نفسك: أنا بخدم مين؟ المسيح؟ ولا نفسي؟
من أخطر الخدع الروحية... إنك تبقى مشغول بربنا... لكن بعيد عن ربنا.
تخدم كل يوم... لكن ما تصليش.
تحضر اجتماعات كتير... لكن ما تقعدش مع المسيح.
تعرف أخبار كل الخدام... لكن مش عارف أخبار قلبك.
وتدريجيًا تتحول الخدمة من علاقة مع الله... إلى نشاط ديني، ومن رسالة...
إلى مسؤولية، ومن فرح... إلى عبء، ومن حب... إلى عادة.
📖 السيد المسيح قال لمَرثا: "مَرْثَا مَرْثَا أَنْتِ تَهْتَمِّينَ
وَتَضْطَرِبِينَ لأَجْلِ أُمُورٍ كَثِيرَةٍ وَلَكِنَّ الْحَاجَةَ إِلَى وَاحِدٍ." (لو 10: 41-42)
مارثا كانت بتخدم... لكن المسيح كان بيدورها على حاجة أعمق... القعدة معاه.
المشكلة مش في الخدمة... المشكلة لما الخدمة تاخد مكان رب الخدمة.
📖 القديس بولس الرسول يقول: "لَوْ كُنْتُ بَعْدُ أُرْضِي النَّاسَ لَمْ أَكُنْ عَبْدًا لِلْمَسِيحِ." (غل 1: 10)
في خدام كتير تعبوا... مش لأن الخدمة صعبة..
. لكن لأنهم حاولوا يخدموا بدون شبع روحي، زي عربية بتحاول تمشي وخزانها فاضي.
القديس أغسطينوس يقول: "من امتلأ بالله استطاع أن يعطي الله للآخرين."،
أما اللي قلبه فاضي... فهيعطي تعبًا بدل التعزية، وكلامًا بدل الحياة.
📌 الشيطان مش دايمًا بيحاربك إنك تسيب الخدمة...
أحيانًا يحاربك إنك تنشغل بالخدمة لدرجة تنسى المسيح نفسه،
تبقى طول اليوم بتتكلم عنه... لكن مش قاعد معاه، بتخدم اسمه... لكن مش سامع صوته.
📌 إيه الحل؟
✅ ارجع لمخدعك.
✅ اقعد مع الإنجيل قبل ما تقف قدام الناس.
✅ خليك خادم يتعلم قبل ما يعلم.
✅ افتكر إن نجاح الخدمة مش معناه نجاح الحياة الروحية.
✅ كل يوم اسأل نفسك: لو اتشالت مني كل مسؤولياتي وكل خدماتي... هل ما زلت أحب المسيح؟
❤️ القديس يوحنا السلمي يقول: "لا تجعل أعمالك الكثيرة تحرمك من الوقوف أمام الله."
في السماء مش هيسألونا: كم اجتماع حضرت؟ كم خدمة عملت؟ كم بوست كتبت؟
لكن هيسألونا: هل عرفتني؟ هل أحببتني؟ هل عشت معي؟
لأن أعظم خدمة نقدمها لله... هي قلب يحب الله.
أخطاء_بنقع_فيها_ونفتكرها_عادي