كيف يغيرنا العلاج النفسي

[walaa farouk]

كيف يغيرنا العلاج النفسي

في ناس بتدخل العلاج النفسي
وهي متخيلة إن التغيير هيحصل لأن المعالج قال جملة سحرية
، أو لأننا فهمنا طفولتنا أخيرًا، أو لأننا بكينا للمرة الأولى
. كأن الجلسة لحظة كشف، وبعدها الحياة هتتظبط تلقائيًا.
لكن اللي بيحصل غالبًا أبطأ وأعمق من كده.

العلاج مش بيغيرنا لأنه بيقنعنا بفكرة جديدة.
الأفكار بنقراها في كتاب وننبهر
، وبعدين نرجع زي ما إحنا. التغيير الحقيقي يبدأ في الحتة
اللي قبل الفكرة، في قدرتنا إننا نسمع حد بيتكلم عننا،
ونحس إن كلامه آمن ومش هيستخدم ضدنا.
ناس كتير عندها جهاز إنذار شغال طول الوقت؛
أي تفسير نستقبله كاتهام، أي ملاحظة تتفهم كرفض و أي اختلاف نحس بالتهديد. في الحالة دي، الجلسة العلاجية بتتحول لساحة دفاع
، مش مساحة تعلم. ومهما كان المعالج ذكي،
مفيش حاجة هتدخل للعميل، لأن العميل فى حالة انغلاق.

اللي بيتغير في العلاج مش أفكارنا ومشاعرنا بشكل فوري
، لكن "علاقتنا بالمعرفة عن نفسنا"
لما نشك في معرفتنا عن نفسنا وعن الآخر وعن العلاقة
وعن العالم، ويبقي عندنا قابلية نستقبل معرفة جديدة من شخص آخر،
لما نبدأ نصدق إننا ممكن نتفهم،
وإن في حد شايفنا من غير ما يختزلنا.
وإنه عنده منظور مختلف ولكن يعمل لصالحنا مش لصالحه،
الموضوع ده يبدو بسيط، لكنه بيغير حاجات قديمة زى الشك
، العناد، التصلب، أو التصديق الساذج
لأي حد يطبطب علينا. لما الثقة دي تتحرك سنتيمتر واحد
، بنبطل نعيش داخل رواية مغلقة عن نفسنا. تبقى في احتمالات،
يبقي فى تغيير.

وبرضه، العلاج ممكن ميغيرش حاجة
. يحصل ده لما العلاقة تفضل سطحية،
أو لما المريض مستعد يسمع نفسه فقط،
أو لما المعالج مش قادر يلتقط الإشارات اللي بتقول "أنا شاكك فيك،
مش مطمنلك، مش واثق فيك" في أوقات بيبقى العلاج مساحة
لإعادة تمثيل نفس المأساة القديمة، بنفس الأدوار، من غير وعي. الشخص يخرج من كل جلسة مرتاح شوية ومقتنع إنه اتفهم، لكن حياته برا الجلسة ثابتة. الكلام بيتقال، بس ما بيتعاشش ومش بيهز حاجة فى كياننا.

التغيير في العلاج غالبًا شكله ممل. تكرار. مراجعة.
إحساس إننا رجعنا لنقطة البداية. وبعدين فجأة نكتشف إن رد فعلنا في موقف معين اختلف درجة صغيرة. إننا سكتنا بدل ما ننفجر.
أو انفجرنا، لكن فهمنا ليه
. أو اعتذرنا من غير ما نحس إننا انهزمنا
. التحولات دي مش بتحصل فجاءة، لكنها تراكمية.
وبعد شهور أو سنين، نلاقي إن النسخة
اللي كانت بتيجي أول جلسة مش هي اللي قاعدة دلوقتي.

العلاج ما بيخلقش شخصية جديدة. هو بيعيد فتح "إمكانية التعلم" من التجربة. لو الإمكانية دي اتقفلت بدري، الحياة بتتحول لإعادة تدوير نفس السيناريو. لو اتفتحت، حتى بنسبة بسيطة، يبقى في أمل إن الحكاية تتكتب بطريقة مختلفة.