غلبانة والا قوية انتى |مارينا الراهبة

[walaa farouk]

بت حلوة ابوها فكر يروح الدير قالتله رجلى على رجلك
ولانك بنت ومستحيل الدير يقبل ..
تروحى قصى شعرك وتلبسى لبس الرجالة وتدخلى معاه الدير وتسمى نفسك مارين

تخدمى الكبير والصغير ويتقلوا عليكى الشغل ماانت الولد الشاب
اللى يقدر يحملوا عليه الشغل الصعب ..
وانتى تشيلى الدنيا على كتافك من غير ملل ولا تعب ..

بنت فى المدينة تقع فى الخطية وماتعترفش بمين شريكها
وترمى التهمة على الراهب الامور الصغير اللى فى الدير ..

يجبوكى ويهينوكى ويطعنوا فى اخلاقك وانتى تسكتى مع ان سهلة خالص
.. تقوليلهم ياشوية كدابين روحوا ربوا بنتكم اجيب منها عيال ازاى وانا بنت زيها .
. بس انتى سترتيها يمكن تتوب ..

قلبك يرق لطفل جاى من الخطية وتقبلى تاخديه فى حضنك ..
تربيه فى مخافة ربنا بدل ما اهله اللى عايشين فى الخطيه يضيعوه ..
فيشرطوا عليكى تطلعى برة على باب الدير بيه ..
فتوافقى تشيلى حمل طفل وانتى عارفة انه هايكون اتقل من الجبال اللى محوطة الدير ..

عيلة صغيرة تستحمل كل ده لوحدها وتشيل مسئولية طفل
فى صحراء مخوفتيش ياجبارة ازاى هاتسددى احتياجاته !! ..
لبستيه ايه .. اكلتيه ازاى ..
طب دفتيه ازاى فى البرد وهونت عليه ازاى حر الصيف ..
طب كنتى بتغيريله ازاى ..!!
طب لما كان بيجيله مغص كنتى بتعملى ايه وانتى فى صحراء .
. !! طب لما كان بيسنن .. !! طب لما كان بيحبى
.. !! طب لما كان بيزن .. !!
عملتى كل ده ازاى وانتى مرمية بيه ومغضوب عليكى ..!!
طب مكنتيش بتخافى بليل ليطلع عليكى ديابة او عقارب فى الصحراء ..!!
طب ممطرتش عليكى وانتى بيه فى الطل مرمية ..!!!!!

يحنوا عليكى اباء الدير بعد ٨ سنين ويرضوا يدخلوكى الدير تانى وسطيهم
تصممى تدخلى بابنك اللى ولدوا قلبك فيرضوا ويبان تعبك وشقاكى فى اخلاق ابن قلبك..
ربنا يسمح انك تمرضى وتتنيحى يجوا يغسلوكى يتصدموا انك بنت
والخبر يملى المدينة واالى اتهموكى يجوا تايبين ويصرخوا عند جسدك علشان تسامحيهم ..

ابن قلبك يكبر بتربيتك ويبقى راهب عظيم بعد ماكان هايربيه اهل خطاه
كانوا رموه وخلصوا منه او طلع نسخة منهم ..

ايه ياجبارة ده .. تفاصيلك كل ما نركز فيها نعرف قد ايه احنا ضعاف قدام ايمانك
.. قدام احتمالك للاهانة .. قدام شقاكى وخدمتك لطفل مش من بطنك .
. قدام ثقتك ان إلهك موجود وبيحمى ويقوى ويسدد كل احتياجاتكم .
. كنتى مشغولة بالطفل اللى ربنا استأمنك عليه اكتر ما مشغولة بسمعتك
او اى اتهام عليكى او خطر هاتشوفيه .. نسيتى راحتك ورد اعتبارك او انتقامك
من اللى افتروا عليكى .. عنيكى كانت مشغولة بعمل الله وسنده فحولك بقوته
من البنت الغلبانة الضعيفة لراهبة قوية جبارة تفوق فى احتمالها وقوتها وايمانها اعظم الرجال
.. لما نشوفها نتمثل بايمانها ..ومهما شفنا او اتحملنا نكون نقطة
فى بحر عظم ايمانك وثقتك فى عريسك السماوى
. اذكرينا يوم عيدك امام عرش الله لنحيا كأيمانك 🙏❤️