رشمت الصليب فالارض اتفتحت وبلعت امير و100 من جنوده | القديسة أفادوكسيا رقاصة بعلبك

[walaa farouk]

✝️رشمت الصليب فالارض اتفتحت وبلعت امير و100 من جنوده
تعرفوا مين دى ؟!⁉️

يلا بينا نعرف قصتها

✝️دى تبقى القديسة أفادوكسيا.
. اللى كانت رقّاصة وبقت قديسة!

فى مدينة اسمها بعلبك فى لبنان،
كانت فيه واحدة مشهورة بجمالها وفلوسها
وعيشتها اللى الكل بيحسدها عليها..

اسمها أفادوكسيا، وكانت رقّاصة كبيرة، وبتعبد النار
.. وعندها قصور وخدم ودهب ومجوهرات،
بس فى وسط كل دا.. كانت فاضية من جواها،
ضحكتها مجروحة، وسعادتها مزيفة.

وفى يوم وهي ماشية، عدت من جنب بيت رجل غنى
كان مستضيف راهب اسمه جيروم،
سمعته بيصلى بصوت فرحان جدًا، وبيقول:
"يارب، شكراً ليك.. وجودك مفرّحني ومغنيني عن كل الدنيا."

استغربت جدًا..
قالتله:
"إنت ليه فرحان كدا؟! أنا عندي كل حاجة.
. بس عمرى ما حِسّيت بالفرحة دى!"
رد عليها وقال:
"اللى عندك مش هو اللى بيفرح القلب..
أنا قابلت الرب.يسوع، وادانى غفران، وادانى معنى لحياتى
.. دا هو مصدر فرحتى."

اتصدمت... وسألته بتلقائية:
"طب خد بإيدى.. أنا عايزة أعرف المسيح دا!

حب يختبر جدية توبتها
ابتسم وقالها:
".. ارجعى المكان اللى جيتى منه.. ."
قالتله بحسم:
"مستحيييييل أرجع تانى لحياة دى!"

وفعلًا راحت دير راهبات..
وقالت له: "أنا حتى معرفش أقول إيه فى الصلاة؟!"
قالها:
"قولى بس جملة واحدة:
يا رب اجذبنى ليك... يا رب عرّفنى ذاتك."

وقعدت 10 سنين كاملة تقول الجملة دى بس!!
قاعده لوحدها فى قلاية، مقفولة
، ليها طاقة صغيرة يدخلوا لها شوية أكل بالعافية.
وكانت دموعها هى خبزها ومياها.

وبعد 10 سنة من التوبة والصلاة..
ظهر جمال النعمة على وشها، ونورها بقى باين حتى من بعيد!

وفجأة، جه الأمير اللى كان بيحبها زمان..
ومعاه ١٠٠ جندى وقال للراهبات:
"طلعوا أفادوكسيا.. يا إما أحرق الدير كله!"

راحوا قالولها، قالت بكل ثبات:
"هطلعله..."

وطلعتله..
وكانت أجمل من أيام خطيتها، بس مش بجمال الجسد،
بجمال النعمة والنور اللى مالي وشها.

قالها:
"إنتى أفادوكسيا؟!"
ردت وقالت:
"اللى بتسأل عليها دى ماتت من ١٠ سنين!
أنا دلوقتى بتاعة المسيح."

ولسه هيقرب منها..
رشمت الصليب، والأرض اتشقّت وبلعته هو وجنوده قدام الكل!
مشهد يهز قلب أى حد!

وبعدها بعت لها الملك يقولها إن ابنه مات بسببها..
راحت القصر بكل هدوء.. وصلت للأمير، وقام من الموت!
الملك نفسه آمن بالمسيح.

أفادوكسيا.. اللى كانت عبدة نار، ورقّاصة، وخاطية
وسط المجد المزيف..
بقت قديسة، بترعب الشياطين
، وبإشارة صليبها غرّقت 100 جندى!
التوبة بتعمل المعجزات،
والنعمة بتغير الماضى،
والرب يسوع لما بيمسك بإيدك..
حتى ترابك يبقى دهب.

النهارده.. افتكر إن اللى عمله مع أفادوكسيا..
ممكن يعمله معاك.

يارب اجذبنى ليك..
يارب عرّفنى ذاتك.