سلسلة المسيح يحب الخطاة

[مورا مرمر]

قلت : كان عندى افكار ان كل ما اسقط فى خطية حرام اصلى لانى باكون نجس وخاطى ؟

قال (بحزن واسى ):هذا ما تعلمناه من المجتمع يا ابنى وتأثر به بعض الخدام بيعملوا ذى اللى بيمنع العلاج من المريض

شاب صغير وهو ماشى فى الطريق بالليل بعد الثورة ومفيش امن فى الشوارع طلع عليه شوية بلطجية واخدوا منه الموبايل ولما حب يقاوم ضربوه بالمطواه فى جنبه وهربوا والولد طلع يجرى على المستشفى بتاعت والده الطبيب الجراح لكن لما حب يدخل اخوه الكبير كان واقف على الباب منعه وقال له "ايه اللى حصل ؟"قال "فيه ناس بلطجيه ضربونى واخدوا منى الموبايل "قال له "ازاى تسيبهم يضربوك "يقول "كانوا كتير "يقول له "ايه اللى يخليك تطلع بالليل كدا ليه مش بتسمع الكلام "يقوله "انا دلوقتى تعبان بموت ارجوك دخلنى بسرعة "يقوله "رائحتك عفنة ولما تبقى محترم وتسمع الكلام هادخلك لبابا"وفضل الابن الكبير سايب اخوه ينزف لحد ما مات .تفتكر ابوه يعمل معاه ايه ؟؟

قلت :موقف صعب يا ابى

قال : تخيل ان الابن الضال لما رجع حراس الباب منعوه من الدخول وقالوله انت نجس وخاطى تطهر ففى الاول واظهر توبتك وبعدين تعالى نشوف الاب هايقبلك ولا لا تفتكر الاب هايعمل معاهم ايه ؟ايه عقوبة اللى يمنع العلاج عن المريض ؟

قلت : دى جريمة قتل ليها اشد عقوبة

قال : كدا برضة اللى يمنع الناس للمجئ الى المسيح بداعى الجدية او الدفاع عن المقدسات ليه الويل

فاكثر وقت تكون فيه صلواتك مقبولة ومطلوبة ومحبوبة يا ابنى هى لما تسقط فى الخطية

قلت (باستغراب ): ليه ؟!

قال : ده اكتر وقت بتكون محتاج فيه لمعونة المسيح علشان كدا الرب يسوع قال "السماء تفرح بخاطى واحد يتوب اكثر من تسعة وتسعين بارا لا يحتاجون الى التوبة وايضا مكتوب كلما كثرت الخطية ازدادت النعمة جدا .رو (5 : 20 )
زى ماقلنا الابن اللى بيمشى فى الشارع والاطفال الاشرار رموا عليه مياة مجارى دا اكتر وقت محتاج يرجع فيه لابوه علشان يعطيه ملابس جديدة ويطبطب عليه .

خلاصة القول يا ابنى

لما تقع فى خطية يا ابنى تأكد ان الله مش زهقان
ولا قرفان منك بل على العكس الله مستنيك ومرحب
بيك هايقبلك ويحتضنك ارجع بسرعة وارمى نفسك
فى احضانه بالصلاة اشبع بحبه وحضنه وهو دا اللى
يجعلك مترجعش للخطية تانى .

قلت : وان رجعت للخطية تانى

قال :معناها ان جعت ومحتاج لحب يسوع وحضن يسوع فأرجع بسرعة تانى وقوله (اشبعنى ياربى يا يسوع بحبك علشان ما ارجعش للخرنوب بتاع الخنازير تانى مش عاوز ارجع للخطية والنجاسة تانى بس انا ضعيف ادينى ياربى قوة وخلينى اشبع بيك وبحبك .انا لوحدى مش هاقدر انت قوتى يارب كل يوم هاجيلك ومش هاسيبك ماليش حد غيرك يارب يسوع ).

قلت (بفرح ): تمام فهمت اول خطوة ان مهما سقطت هارجع بسرعة واثق ان الله مش هايرفضنى ولا زهق منى وهاطلب نعمته وحبه وانه يشبعنى .ايه الدافع التانى للرجوع للرب يسوع يا ابى ؟؟

قال :الدافع الاول للرجوع هو ثقة الترحيب وعدم الرفض المؤشر التانى هو

ثقتى فى الحماية

قلت : يعنى ايه ثقتى فى الحماية

قال : كتير من الشباب يقول (مش عاوز اقرب من ربنا قوى علشان الشيطان ميحاربنيش ويهيج علي ).

قلت : وهل دا صحيح يا ابى

قال :دى خدعة من الشيطان يا ابنى علشان يخوفك ويبعدك عن المسيح فتكون عبد ذليل ليه طول عمرك فعلى العكس لما تقرب من ربنا اكتر تاخد حماية اكتر بل تكون فى حمايته ومسئوليته لما كنا صغيرين فى المدرسة وكنا نتخانق مع بعض فكان واحد يروح للتانى ويقول "انا فى حمايتك يافلان او انا فى عرضك يا فلان "يروح الطفل التانى يدخل فى الخناقة ويقول "خلاص يا جدعان قال فى حمايتى "ويتحمل المسئولية (بقى طفل يعمل كدا طيب الله يعمل ايه ؟.لما حد من اولاده يطلب حمايته من ابليس وحروبه دا مكتوب من يمسكم يمس حدقة عينه .زك (2 :8 )يعنى اللى يمسكم كأنه بيمس حدقة عينه ويقول ها انا اعطيكم السلطان ان تدوسوا الحيات والعقارب وكل قوة العدو ولا يضركم شئ .لو (10 : 19 ).وايضا اله السماء سيسحق الشيطان تحت اقدامكم سريعا .رو (16 : 20 )فالله مش بس بيحمينا دا بيسحق الشيطان تحت اقدامنا ويعطينا قوته وبروحه يسكن فينا .

فأن لم يثق الانسان ويصدق ان الله
سيحميه من ابليس وشروره استحالة يغامر
ويرجع ويتوب وبل هايفضل خايف
ومرعوب ويخاف يرجع يرجع للمسيح ويفضل
فى الخطية .

غدا بأذن الله سوف نكمل معا
صلوا لاجلى ..