|
 |
 |
 |
|
رقم المشاركة : ( 1 )
15 - 08 - 2020, 06:49 PM
|
|||||||||||
|
|||||||||||
 هانتكلم في حلقتنا ديه عن رحلة مهمة وهايكون فيها جدل كتير وهانعرف مع بعض شوية تفاصيل مش مشهورة مدونة فى كتب مترجمة ومخطوطات بالاديرة وابطال حلقتنا انهاردة هما المجوس علماء فى علم الفلك نركز فى المصطلح اللى بقوله ( علماء ) لان فى ناس فاكرة ان المجوس يعنى المنجمين وكشف الغيب والسحر لالالالالالا الفكرة دى ظلمت المجوس تماما عند معظمنا المجوس كان عندهم علم بوجود خالق و بميلاد ملك سماوى على الارض وكان عندهم تنبؤات كتيرة زى بالظبط لما اليهود كان عندهم تنبؤات بميلاد المسيح بس فى رائى الشخصى ان المجوس طلعوا احسن من اليهود لانهم قاموا برحلة شاقة وسفر من فارس الى اورشليم حوالى6 شهور علشان يزوروا المسيح ويقدموا الهدايا اللى كلنا عارفينها تعالوا نفكر فى كام سؤال اية اللى عرف المجوس ان الطفل دا ملك ؟ طب دون عن الهدايا اية اللى خلاهم يجيبوا دهب ولبان ومر طب الدهب ماشى ممكن يتصنف انة هدية لملك لكن انا رايح المشوار دا كلة علشان اقدم اعشاب مرة اكيد الموضوع دة لة جزور عندهم واكيد فى عقيده عندهم خلتهم يعملوا كدا واكيد الناس دى مش اشرار ولا سحرة ولا مشعوذين ومن شدة علمهم وذكائهم وكما اوحى لهم فى حلمهم فهموا ان هيرودس عاوز يضر الطفل فضحكوا علية ومشيوا من طريق تانى بعد ماخلصوا رحلتهم يعنى ساعدوا فى انقاذ الطفل من سيف هيرودس لانهم كانوا ناس حكماء بالاضافة لعلمهم كان فى شاب كلنا بنحبة اوى كان فى بلاد فارس اسمة دانيال اللى ربنا انقذة من جب الاسود الراجل دا كان فى بلاد فارس الملك نبوخذ نصر اعطاة لقب كبير المجوس لانة اشتهر بحكمتة الشديدة وكان معاه الاسفار المقدسة النبواءت اليهود وكانوا بيحبوا يسمعوا تعاليمة وقالهم خلوا باللكم بقا لان كلام دنيال دا هو اللى المجوس عرفوا من تعاليمة وكلامة عن التوراة ان هايجى المسيا هايكون ملك السماء وفى نفس الوقت هايكون اعظم كاهن عالارض لكن لازم يفدى البشرية بموتة وعذابة والحكماء اللى هما المجوس سجلوا كل كلام دنيال وانتظروا هذا الحدث العظيم خصوصا ان فى احدى النبؤات ليها علاقة بعلمهم ( علم الفلك ) المقولة بتقول انه هاياتى كوكب من يعقوب يعنى اليهود وهى نبوءة بلعام اللى سجلوها وانتظروا تحقيقها الكلام دا كان مع اجداد المجوس لحد ماحصلت ظاهرة فلكية غريبه وظهور النجم اللى كلنا عارفين مواصفاتة وانهم اعلنوا ان نبوءات اجدادهم هاتتحقق وزى محنا عارفين جهزوا كل حاجة وطلعوا وراء النجم الحياة السياسية فى الوقت دا بين فارس والرومان مش لطيفة وكان فى حروب بينهم شديدة المجوس كانوا شخصيات مهمة فى فارس لانهم كانوا من صفوة القوم من حيث الحكمة والعلم وكانوا كهنة ديانة زاردشت فكان لازم علشان يدخلوا مدينة يهودية وتحت الحكم الرومانى كان لازم ينزلوا على الملك الرومانى من باب بروتكولات الزيارات السياسية واللى يدل على اهميتهم ان الملك هو اللى قابلهم بنفسة وفهم سبب زيارتهم واداهم الامان علشان فى سؤال ديما يتسأل هو لازمة انهم يروحوا للملك هيرودس لانهم بسبب سوء الاحوال السياسية اللى اتكلمت عنها كان ممكن اى جندى رومانى يقتلهم ويعتبرهم جواسيس من بلاد فارس بعض الكتب بتقول ان عدد المجوس كانوا سبعة وفى رواية فارسية بتقول ان الرحلة دى كانت مكونة من 12 عالم لكن طول مسافة الطريق اللى فضلت 6 شهور وان كان معاهم شيوخ فا ماتوا فى الطريق وكان من عادات اصحاب المعتقد ديانة زاردشت ان اللى بيموت لا يدفن ولا يحرق , لكن بيترك على اسطح المنازل لتاكل جسدة الصقور والنسور وتصعد بة للسماء ( دا معتدقاتهم الخاصة ) لكن المشاع عندنا انهم ثلاثة من المجوس بعدد الثلاث هدايا اللى قدموها للطفل واخذوا بركتة ورجعوا لبدلهم وكان هيرودس مستنيهم علشان يعرف مكان الطفل ويقتلة لكن لما اتاخروا وهو عرف انهم سابوا البلد ورجعوا كان غضبة شديد جدا وجمع كهنة اليهود علشان يفهم الحوار دا ولما فهم انة دا ملك ووجودة بيهدد الملك الرومانى قرر انة يتخلص منة , ولما عملوا حسابتهم علشان يعرف سن الطفل ومع تضارب الاقوال وان المسيح اتولد فى بيت لحم وبعد الختان وتقديم العذراء للهيكل يقال انهم رجعوا للناصرة فى بيت يوسف وبعد سنة جم للهيكل وعدوا على بيت لحم وفى التوقيت دا كانت زيارة المجوس يعنى الصورة بتاعة الميلاد اللى فيها الرعاة والمجوس والطفل الرضيع دى صورة خاطئة من الناحية الزمنية والناس اللى فاكرة ان يوم ملاد الطفل حضر المجوس مع الرعاة برضة الفكرة دى مش صح من حيث الزمن عشان هيرودس يضمن ان الطفل مات فقرر ان جنودة تقتل كل الاطفال اللى فى بيت لحم لحد سن سنتين وقت ماهيروس اخذ القرار الملاك ظهر ليوسف النجار وقالة خذ الصبى وامة واهرب الى ارض مصر فى الوقت دا كان معاهم بنت خالة مريم اللى اتكلمنا عنها امبارح سالومى اللى رفضت انها تسيبهم وقررت تبقى معاهم فى رحلتهم راح يوسف اخذ الحمار بتاعة وحتى مالحقش يجهز اى حاجة واخذ العذراء مريم والطفل واتجة خارج البلد ويقال ان العذراء كانت بتسمع صوت بكاء الامهات فى كل مكان بسبب مقتل اطفالهم وفى مخطوطة قديمة اتكلمت عن حدث مؤلم ان العذراء كانت بتشوف دم الاطفال الابرياء فى الشوارع وكانت هى ويوسف وسالومى فى حالة من الرعب الملك لما عرف انهم هربوا قرر انة يبعت وراهم جنودة وفعلا الجنود كانوا بيطاردوا العائلة من اول ماخرجوا من بيت لحم وبكدا حلقتنا خلصت انهاردة وسامحونى لو طولت عليكم انهاردة وبكرة الجماعة جايين عندنا مصر هانشوف من بكرة المصريين عاملوا اية فى اماكن شافوا فيها قبول وترحاب واماكن شافوا فيها طرد واتهامات ومعجزات كتيرة واحداث مهمة حصلت عندنا وقصص مش مشهورة هانتعرف عليها بركة ام النور الجميلة تكون معانا جميعا امين 
|
 |
|
| قد تكون مهتم بالمواضيع التالية ايضاً |
| الموضوع |
| مسلسل مريم الحلقة (14) الحلقة الأخيرة ثيؤطوكوس |
| مسلسل مريم الحلقة (13) نور من قبور |
| مسلسل مريم الحلقة (12)من مصر الي الناصرة |
| مسلسل مريم الحلقة (11) قصص وعجائب في أرض مصر |
| مسلسل مريم (الحلقة الاولي) |
العرض العادي
