الحب الحقيقي وقت ماتسيبوهم علي راحتهم

[Mary Naeem]

الحب الحقيقي وقت ماتسيبوهم علي راحتهم

لما بنمسك حاجة بقوة ،ونتشبث بيها في قبضة أيدينا مع الوقت أيدينا بتضعف، ونتعب من طول التمسك وقوة المسكة، فبتترخي غصب عنا ،وأحيانا بنضطر نسيبها ،وكمان هيابتتكسر من كتر الزهق، أو بتطبع علي أيدينا بشكل من أشكالها وفي النهاية بنشعر بالألم ،بالأخص أول مانسبها ونتخلي عنها.

وده بالظبط عامل زي الحب اللي بنحبه للناس، بنكون متعلقين بيهم أوي ،ومتشبثين بوجودهم وماسكين فيهم وخايفين أحسن يمشوا، أو حد تاني يجي ويحبهم مكاننا، متوقعين أن الحب اللي بنحبه لهم ماحدش هيقدر يديه لهم غيرنا ،ومستنين يدونا نفس الحب بنفس المقدار ،ويبادلونا نفس التصرفات، ويحافظوا علي تواجدنا، شايفين أننا لازم نكون محور الكون لهم ،والسبب الأساسي لسعادتهم ،وأن مفروض دايما يفكروا فينا وفي سعادتنا ،ويلجأوا لنا في كل وقت ،حتي لو زعلانين لازم نكون أول حد يحكوا له، وأول شخص يكلموه أول مايصحوا من النوم، وفي أي وقت يختاروا شئ لازم يشركونا في الاختيار، ده كمان بتوصل لدرجة لو هيكلموا أو يتعرفوا علي حد جديد لازم يأخذوا أرائنا فيه قبل مايقرروا يعملوا كده.

بنبقي منتظرين منهم الاهتمام الدائم ،والخوف علي مشاعرنا ومصممين أنهم يدونا كل المشاعر الحلوة ،وفي الوقت اللي أحنا محتاجينه، مش مهم هما حاسين بأيه في الوقت ده، المهم نكون أحنا مرتاحين ومستكفين بيهم، عايزين نتكلم ويسمعوا لنا حتي لو الكلام مش مفيد لهم ومش بيشغل اهتمامهم، مادام طالع مننا يبقي لازم يسمعونا، وكمان يردوا علينا ويشاركونا مشاعرنا ،كل ده بيكون مطلب أساسي لكل طرف من الأخر في أي علاقة ،وبيفكروا أن ده الحب ولكن للأسف ده تعلق، اللي في الأخر لازم ينتهي بأوجاع وآلام أو بيفضل موجود ولكن مافيش سعادة بينهم، ولا عارفين يحبوا لأن فكرهم عن الحب غلط، أو مش بيكملوا لأن هما الأثنين أو حد فيهم مش فاهم حقيقة الحب ،ومَطالب الحفاظ علي صحة دوام العلاقة بين الطرفين.

الحب الحقيقي محتاج الترخي، أنكم قادرين تتمسكوا ببعض بس بلطف ولين ،لاتشدوا أوي ولا تتخلوا خالص، أنكم تستحملوا بعض في الوقت المناسب لكل واحد فيكم ،فلا تضغطوا علي نفسكم تتحملوا حد وقت زعلكم، ولا تضغطوا علي حد يتحملكم ،وأن المشاعر اللي حابين تحسوها من الطرف الأخر أو تدوها له تطلعوها لكم في الأول، فتحسوا من جواكم بالسعادة عشان تقدروا تسعدوهم، وتؤمنوا بالحرية عشان تسمحوا لهم بالتحرر عنكم أنكم تفرحوا وقت وجود ناس حباهم زي مابتحبوهم ،وأنكم تشعروا بالنشوى وقت وجود مصادر كثيرةمحققة لهم شعور الفرح والسرور.

الحب الحقيقي وقت ماتسيبوهم علي راحتهم، فيحبوكم بالقدر اللي عايزينه ويتواجدوا وسطكم في الوقت المتاح لهم، ويسمعوكم في وقت فراغهم، ويسمعوا منكم الكلام اللي حابينه ،أنكم تحاولوا تتواجدوا في حياتهم بكل حاجة حلوة ومفرحة، وتسمعوهم كل خبر سعيد هيبهجهم ،وكل كلمة هتريح قلوبهم وتقر عيونهم، وتتشاركوا في كل خير هيساعدكم تُجازوا بالسعادة .

لو كل طرف فكر في الحب بالطريقة الأصح، ووفر الحب للطرف الأخر بالشكل اللي حابه، هتكون العلاقات أكثر تعقيدفي فهم ازاي هما مرتاحين مع بعض كدة ،أو متفاهمين وفاهمين بعض ،وأزاي هما روح واحدة برغم الاختلاف، وأزاي هما عايشين بسعادة برغم وجود مشكلات حواليهم زيهم زي غيرهم ،وأزاي هيختفي النكد والحيرة ،وهتتملى العلاقة حب وود وانسجام ،وممكن توصل الروابط بينهم للإلتصاق لأن الناس بتميل للعلاقات المريحة ،وبيكون كل طرف حابب يفضل جنب الشخص الأكثر راحة ،فمش بيلاقي إلا الشخص اللي بيحبه الحب الحقيقي وموفر له كل سبل الانبساط .

.