|
 |
 |
 |
|
|
|
رقم المشاركة : ( 1 )
13 - 02 - 2020, 01:43 PM
|
|||||||||||
|
|||||||||||
 الكتاب ما قلش ان يونان بكى.. بس مش كل دموع لازم تنزل من العين.. ساعات الدموع تبقي دموع قلب.. دموع صمت.. دموع وجع جوانى .. دموع وحدة حتى وسط الناس.. ساعات تبقي دموع مخفية ورا ابتسامة.. اللى بيعرف يبكى ده ساعات بيفرج عن نفسه و يعبر عن المه.. علشان كده ممكن ينطبق عليه " إلى مياه الراحة يوردنى" .. الدموع اللى بتنزل من العين غالية اوى عند ربنا.. فيه مزمور داود يقول "تيهاني راقبت. اجعل أنت دموعي في زقك. أما هي في سفرك؟" (مزمور 8:56) يعنى داود بيقوله يارب انت واخد بالك كام مرة تهت و سكنت كهوف في هروبى من شاول .. خلى دموعى في زقك.. الزق ده زى ازازة صغيرة او قربة جلد زمان .. و حكاية احفظ دموعي عندك متاخدة من عادة قديمة لما كان صديق يروح يواسي صديقه الحزين كان ساعات يبكى معاه و ساعات من كتر البكا يعصر المنديل لو دموعه يعنى سحت بغزارة في زجاجة صغيرة كام نقطة كده بس دموع غالية و يحفظون الزق تذكار الصداقة و تتكتب في سفر ذكرياتهم.. سواء كانت العادة حقيقة و لا مجرد حكاية لكن تقول حاجة.. إذا كانت الدموع اللى بتنزل من العين غالية عند ربنا اللى هو الصديق و الصاحب الحقيقي .. فمابالك الدموع الجوانية و الوجع اللى مش متشاف.. الناس ممكن تنسي دموعك بعد شوية و لو بكيت للناس دموعك تقع في الأرض في التراب و التراب مش بس اللى تحت رجليك لكن الناس نفسهم تراب كلنا تراب كلنا موجوعين فمين يسند مين.. ده ساعات من قسوة الناس تدوس دموعنا ب الأقدام.. بتجاهلها.. يزهقوا منها..يسخروا منها و يتقال يخرب بيت نكدك او بوزك العقد او انتى ما بتشبعيش عياط اوئة كده على طول .. بس ربنا لا.. اللى يحط دموعه بين ايديه يحفظها يسوع في زق عنده و يكفكفها و يمسحها و يطيب خاطر كل موجوع يروح له.. فيه اية في سفر الرؤيا بيتكلم فيها عن الحياة الأبدية بعد قيامتنا.. فيقول وَسَيَمْسَحُ اللهُ كُلَّ دَمْعَةٍ مِنْ عُيُونِهِمْ... طب ليه ما قالش يمسح دموعهم و خلاص.. ؟ ليه كل دمعة؟ اصل كل دمعة كان ليها وجع بتاعها .. يمكن ساعة الوجع ده و غالبا ما فهمناش عمل كده ليه.. صعب علينا منه.. حسينا اننا منسيين.. يمكن اتوجعنا بظلم.. بفراق.. بكسرة مشاعر.. بعشم ما اتحققش.. بطلب ما استجبش ليه .. بضيق حياة.. بشريك مؤلم.. دموع الحوجة.. دموع الوحدة.. و سألنا ليه؟ و ما خدناش رد.. ففضلت دموعنا جوانا.. هناك بقة في الأبدية.. حيشرح كل دمعة ليه سابها تنزل و حيفهمنا فتتمسح من ذكرياتنا .. اكيد الام اللى راح ابنها بدرى مثلا او اللى مسنود على اب او ام او اخت او زوجة او زوج و بكى و بكت و اتوجع و اتوجعت و سأل ليه ما طولش فى عمرهم ليه ما شافهوش او شفاها؟ ليه فضل المرض؟ ليه ما تحققش العدل في الأرض ....؟ ليه ما شالش القسوة..؟ ليه... و ليه.. و ليه.. ؟ و بكينا و اتحسرنا ساعتها و ما فهمناش و ما تعزيناش.. في الأبدية بقة حيمسح كل دمعة و يقول لنا دى علشان كنت عاوزك تبقي كذا و دى حميتك من كذا.. و دى علشان ما تضعش منى اصلى بحبك اوى .. و دى... و دى.. طب ايه علاقة ده ب يونان ؟ يونان عاش في حكم الموت تلات ايام و قام زى ما بنقول في مرد تسبحة نهاية القداس طول صوم يونان و شاور على موت المسيح و قيامته.. و طالما بقي فيه قيامة يعنى ابدية و ملكوت حتى لو مذاق ... يبقي ربنا يمسح كل دمعة .. ياخد يونان و يفهمه الألم اللى اتوجعه.. اصل يونان اتوجع اوى و دموعه كتيرة حتى لو مش من العين.. اصحاح صلوته من بطن الحوت كله وجع.. و الرابع اول كلمة فيه اغتم يونان.. و بعد اليقطينة اكتئب و طلب الموت ...دموع .. طب تعالى امسح كل دمعة و كل وجعة و افهمك.. و اسخر لك الكون كله يا يونان كمان علشان خاطرك.. بحر و ريح و بحارة و حوت و يقطينه و شمس حارقة و دودة.. علشان اطبطب عليك .. دمعتك كانت علشان انت مش فاهم غلاوة كل واحد من البشر عندى .. مستكتر انى احاول انقذ ولادى.. خليقتى.. تعال امسح دمعتك و افهمك.. دمعتك في الحوت علشان عاندت و كان ممكن اسيبك تهلك.. انت تهرب منى يا يونان انت؟ بذمتك كنت ناوي تهرب على فين؟ هو انا مش خالق البر و البحر و السما زى ما انت قلت ؟ دمعة وجعك ان كلمتك نزلت وقبلت انا توبة نينوى و دمعتك على اليقطينة اللى دبلت علشان اشرح لك محبتى لكل نفس اد ايه.. اد انى انزل و اتجسد و افدي الكل و ادعو الكل.. انا اب يا يونان.. اب.. مش قصة دموع تتمسح و النهايات السعيدة و بس.. لا.. كل دمعة حطبطب عليك فيها و امسحها مش امسحها و خلاص و افهمك اللى يشيل وجعها من قلبك نهائى و ينسيك و تفرح.. ابدية ربنا ما فيهاش دموع.. يمكن فيها زق دموعك.. للذكرى.. لغلوها.. تشوف ساعتها انه كان عينه عليك في كل تفصيلة.. اللى عاوز ربنا يطيب خاطره و يفهمه شوية رغم اننا في ضيق الجسد و دماغنا وقلبنا مقفول لسه يروح القداس و يتناول.. ماهو ساعتها بنبقي في حتة من السما.. سر الاعتراف و التوبة تتمسح فيه دمعة لان ابنى هذا كان ميت فعاش.. يعنى قيامة يعنى سما و طالما سما يبقي يمسح كل دمعة.. دمعة سقوط.. دمعة نفس انكسرت في الخطية و عانت.. الله يطبطب على كل قلب موجوع و مطروح و هربان و يمسح كل دمعة و اللى ما تتمسحش يخليها في زق عنده.. 
|
|
13 - 02 - 2020, 02:34 PM
|
رقم المشاركة : ( 2 ) | ||||
|
† Admin Woman †
|
رد: دموع يونان
مشاركة جميلة جدا ربنا يبارك حياتك |
||||
|
|
|
13 - 02 - 2020, 07:24 PM
|
رقم المشاركة : ( 3 ) | ||||
|
..::| الإدارة العامة |::..
|
رد: دموع يونان
ميرسى على مرورك الغالى  |
||||
|
|
|
22 - 02 - 2020, 08:53 PM
|
رقم المشاركة : ( 5 ) | ||||
|
..::| الإدارة العامة |::..
|
رد: دموع يونان
ميرسى على مرورك الغالى |
||||
|
|
 |
| أدوات الموضوع | |
| انواع عرض الموضوع | |
|
العرض المتطور