منتدى الفرح المسيحى  


العودة  

 
 
أدوات الموضوع انواع عرض الموضوع
  رقم المشاركة : ( 1 )  
قديم 05 - 12 - 2018, 06:04 PM
الصورة الرمزية توتا كمال
 
توتا كمال Female
..::| مشرفة |::..

 الأوسمة و جوائز
 بينات الاتصال بالعضو
 اخر مواضيع العضو
  توتا كمال غير متواجد حالياً  
الملف الشخصي
رقــم العضويـــة : 123370
تـاريخ التسجيـل : Feb 2017
العــــــــمـــــــــر :
الـــــدولـــــــــــة : القاهره
المشاركـــــــات : 532

الام اللي مش هتقرأ المقال ده هتخسر بجد انا استفدت منه جدا جداااااااااااااااااا
نفسك تربي ولادك صح و ببلاش ؟!
معاكيش فلوس تحضري كورسات تربية عشان غالية ؟!
دا كورس تربية مكثف في 37 نقطة ♡♡♡

إزاي لما أقول لابني انا هخاصمك، ينهار م العياط؟
وأما أحاول أعلمه حاجة يبقى فرحان مش قرفان؟
وأما ييجي وقت قعادنا سوا يبقى طاير م الفرحة؟
وإنه يتمنى انه يتزوج زوجة "زي ماما"؟
ويلجألي بعد ربنا في كل همومه و مشاكله وياخد برأيي؟
إزاي أخليه يحب بِرُّه بيا و يسعى له غيبا حتى وأنا مش شايفاه ومش قدامه؟
إزاي ابني يقول لي "بحب أتكلم معاكي أوي يا ماما".

👈خلي بالك، كل حاجة هنا هتعمليها معاه، احتسبي فيها أجر إنك بتقدمي لعروسة المستقبل زوج صالح يقر العين والخاطر،

وبتحوشي لنفسك دعوات من عروسة ابنك ليكي عشان علمتي ابنك الرحمة والخيرية مع أهل بيته وفن الحب والمودة والسكن..

نقط كتير تقدري بيها او ببعضها، انك تحسسي ابنك بالاهتمام و الثقة بالنفس والاحترام و الحب و الصداقة والرحمة و الامومة ....الخ،

باختصار المودة والسكن والقرب .. والحب.. ❤ بعد الاستعانة بالله والدعاء . نفذي النقط دي :

1- لما يلجألك ف مشكلة تخصه اسمعيله باهتمام وتفاعل، مهما كانت تافهة.. وساعديه في حلها طبعا 😑 ..

سيبك من نظريات التربية الحديثة اللي تقولك سيبي ابنك يحل مشكلته لوحده عشان يعتمد على نفسه..

إحنا عندنا رحمة وأمومة فطرية ما ينفعش نحطها ف الفريزر عشان نكبر ولادنا قبل الأوان..

ياخد نصيبه من الرحمة والاحتواء والحنية الأول، ومفيش مانع كل ما يشتد عوده تلقنيه إزاي يبحث عن حل لمشاكله معتمدا على نفسه، لكن ما تعلميهوش أبدا إن عقله يغنيه عن مشورتك ووقفتك جنبه..

الأصل: إنك هنا دايما جنبه ❤ #الحب_احتواء

2- لما يقول آسف اقبليها.. بلاش إذلال.. مهما كررها وكرر نفس الخطأ.. لازم يعرف إن الفرق بين "آدم" و إبليس "اعتذار"..

بلاش تيئسيه من عفوك وتقنطيه من رحمتك.. "فاغفر لي فغفر له".. كل ما يغلط إديله أمل إن معلش إنت لسة بتتعلم و كلنا بنغلط ركز انت بس و ادعي لنفسك و ادعيلي معاك.. #الحب_مغفرة_وأمل_وصفحة_جديدة

3- اوعوا تناموا متخاصمين و تروحي تبوسيه بعد ما ينام وهو مش حاسس وبس كدة .. بوسوا بعض واتصالحوا قبل النوم حبيبتي مش بعد النوم..

خليه ينام في حفظ الله وأمانه مش ينام وقلبه مكسور.. بلاش يتعود على إن "عادي إن الحبايب يناموا متخاصمين".. #الحب_تصفية_أول_بأول

4- بلاش رفض وصد للعناق وانتي زعلانة منه أو وإنتي ملخومة في حاجة.. علميه ان الحضن مالوش وقت.. بالذات وقته هو وإحنا زعلانين مع بعض... ". #الحب_حضن_كبير

5- لما تلاقيه مزنوق في موقف بايخ بيتهاجم فيه أو ملبوخ، دافعي عنه، واذكري مزاياه للي بيهاجمه.. #الحب_دفاع_وحماية_وسند

6- تغافلي كتير كإنك مش شايفة العك بتاعه.. ولما تقفشيه ف حاجة غلط عرفيه ساعات إن إنتي كان ممكن تعملي كذا وكذا كعقاب، بس هتسامحيه المرادي عشان "بتحبيه" و"مش بتحبي تزعليه".. مع بعض الحزم طبعا وإنه يفهم إن مش كل مرة كدة.. #الحب_تغافل

7- اديله مساحة خاصة بأحلامه الخاصة بيه هو، مش أحلامك إنتي. #الحب_مش_أنانية

8- فهميه إنك هتحبيه حتى لو ما طلعتيهوش نسخة منك.. المهم يبقى رجل صالح. #الحب_حرية

9- استحملي نكته السخيفة.. واكتبيهاله ف ورقة و شيليها للذكرى في برطمان الذكريات.. و اكتبي تحتها "عشان تعرف أنا استحملتك اد إيه يا ضنايا " #الحب_استحمال

10- ماتعامليهوش كمواطن درجة تالتة ولا كمواطن مالوش عندك إلا الحقوق وواحد زائد واحد يساوي اتنين وكدة.. لأ عامليه كصديق عزيز حقيقي زي زوجك و أختك و صاحبتك..

عامليه كحد من حقه تخاطبي عقله و تقنعيه و تتحاوري معاه مش كله قفش واوامر وطاخ طيخ طوخ.. #الحب_تحاور_بين_العقول... عامليه كحد بتحبي تسمعي الرغي بتاعه والقعدة معاه #قدر_طاقتك_طبعا_قلبي_عندك 😀 .. #الحب_تقدير

11- إديله أسرار خاصة بيه هو بس.. ولو حتة أسرار مفتعلة كدة وكدة.. وحبذا لو أخوه اللي قريب من سنه كمان يطلع عليها كمان، عشان يتعلم إنه ما يخبيش سر على أخوه.. أنا بحب كدة وبحس إن التفريق بين الإخوات بيبدأ من هنا. #الحب_ثقة

12- ناديله بألقاب جميلة زي يا صاحبي و يا حبيبي و يا دراعي اليمين...الخ ، #الحب_كلمة_طيبة_وإعزاز_ودلع

13- هزري معاه وضحكيه.. وزغزغيه كمان.. #الحب_زغازيغ😀

14- لما يتعور أو يقع ف أمر مؤلم، حسسيه بلهفة وقلق عليه كبير، حتى لو هو الغلطان بسبب طيشه، واعملي دة بتوازن بردو من غير ما تخليه طفل مايص ومفتقر للرجولة والخشونة –تعليم الرجولة والخشونة سواء بنت أو ولد على فكرة-

طب ازاي؟ طبطبة و تخفيف آلام أولا وألف سلامة حبيبي و ترقيه وتحطي إيدك مكان الألم وتقولي ذكر الوجع....

ثم بعدها تعاتبيه وتعلميه غلطته.. واعملي دة حتى

لو بسبب انه ما سمعش كلامك.. معلش انا عارفة اننا بنبقى هنموت و نفحهمهم ..

بس نجاهد نفسنا اننا نأجل العتاب والدروس المستفادة بعد ما وجعه يروح .. "انت مجروح دلوقتي دة مش وقت عتاب" دي جملة عجبتني أوي في منشور قديم لأحد الأفاضل..

بس دة ما يمنعش ان احيانا ف ساعة الموقف تعاتبي.#توازن.. لكن الأصل هو الرحمة واللين والرأفة. #الحب_رحمة

15- لما يكون مركز ف حاجة إديله فرصته يخلصها و يجيلك، طالما ينفع ومانتيش مستعجلة.. لو ما ينفعش، هو هيتفهم البر والأولوية والطواريء،

طالما علاقتكم ببعض قوية وبناءها هرمي #متوازن مبنية عالتفاهم والاحترام والحب، ولو قصر في تلبية ندائك بسبب تركيزه في حاجة بقوة، اعذريه ونبهيه ما يكررهاش تاني وخلاص،

مش لازم تحطمي أعصابه و تورثيه توتر دائم عند ندائك عليه، كلنا بننفصل عن العالم الخارجي وإحنا مركزين.. #الحب_رفق_ومعذرة

16- لو ف مرة كان عاوز مية مثلا هاتيله إنتي.. مرة كدة.. و قوليله "هجيبلك انا المرادي يا حبيبي ما انت ياما سقتني وأنا بحب أدلعك"، و ادعيله دعوة حلوة.. #الحب_امتنان_ومقابلة_الإحسان_بإحسان ..

17- ألف باء تربية علموهالنا: دايما انقدي فعله و بلاش تذمي فيه هو شخصيا.. مثلا "أسلوبك وحش" مش "إنت وحش"..

18- ألف باء تربية علموهالنا بردو: لما يغلط ماتجيش ناحية مساحات الود والحب و الذكريات الحلوة اللي بينكم...

مثلا تقولي "مش بحب لما بتعمل كدة" مش "مش بحبك لما بتعمل كدة".. ولا بسبب غيظك منه تقومي تتريقي على أي ذكرى حلوة كانت بينكم أو هدية جابهالك قُريب أو زمان،

ناهيكي عن إن دة بداية كسر خاطر واستهانة بالعواطف والمشاعر، وتبرير لسحقها عند كل زعل.. الحب حاجة والزعل حاجة تانية..

19- بلاش تِمني عليه بنعمتك وودك معاه.. هيكره الدراع اللي بتلويه منها.. وممكن يقطعها عشان يحس إنه حر مش عبد.. #الحب_تواضع_وبذل_لله

20- لما يقول على نفسه وحش وإنه بيزعلك كتير و نفسه يبقى بار بيكي بس فاشل، قوليله انت أصلا زي الفل وأنا راضية عنك –سامحني يا رب

حتى لو بتبالغي، دة اسمه تحميس وتحفيز للخير بالإيحاء النفسي- وإنت كل يوم بتتحسن يا حبيبي، ما تبطلش دعاء لنفسك إنت بس، أنا عشان عاوزاك حد مختلف فبدقق معاك كدة عشان بحبك #الحب_تشجيع

21- استقبليه استقبال مبهج ودود بدون افتعال، لما يدخل البيت .

وامسحي على شعره من وقت للتاني مع ابتسامة حنينة.. ومثلا أما يصحوا من النوم اضحكي ف وشهم وقولي "أهلا أهلا حبايب قلب ماما".. #هتحتاجي_قفص_لمون : D.. #الحب_لهفة_وحنية

22- ادعيله أحيانا بصوت مسموع وفي وشه، كل ما يعمل لك حاجة بترضي ربنا أو بترضيكي.. أو في نهاية كل جملة يقولها وبتردي عليه فيها...إلخ، يعني بمناسبة ومن غير مناسبة..

خلي دايما دعواتك الطيبة له بترن في ودانه كأسلوب حياة.. هيتعلم يطيب لسانه مع الآخرين. #الحب_دعاء .. واوعي تدعي عليه.. #الحب_مش_انتقام ..

23- اعزمي أصحابه في البيت واتفشخري بيه قدامهم وأكرمي ضيافتهم لأجل عيونه.. وقدام صحابه وصحابكم وأهلكم كلكم، حسسيه انه صاحبك.. خد يا صاحبي.. هات يا صاحبي.. #الحب_افتخار_ومدح

24- اعرفي لونه المفضل وهوايته المفضلة واكتر واحد صاحبه في المدرسة واكتر معلمة بيحبها ونفسه يطلع ايه لما يكبر وأكلته المفضلة وكرتونه المفضل.. اتعلمي متطلبات كل مرحلة عمرية بيمر بيها وخصائصها ورغباتها..

دي اهتمامات بسيطة صعب أوي أي أم نفسها ابنها يقرب منها ما تكونش عارفاها. اتعلمي متطلبات كل مرحلة علمية بيمر بيها وخصائصها ورغباتها.. .. #الحب_اهتمام

25- وطبعا اعرفي لعبته المفضلة واحترمي شغفه بيها، وهواتيه المفضلة ونميها له.. #الحب_إشباع ، والعبيها معاه حتى لو كورة وإنتي بتكرهي الكورة ولو حتى ماتش كورة خفيف.. #الحب_تضحية

وفهميه إنك مش بتحبيها لكن عشان عاوزاه يفرح بتلعبي.. #الحب_بيعمل_المعجزات .. العبي معاهم وارجعي طفلة من تاني، في البيت بس طبعا 😑 .. العبي واضحكي وانزلي لمستواهم بدون قلة احترام وبدون عنجهية بردو.. #الحب_تباسط ..

26- سخري بيتكم لراحة ولادك وفرحتهم.. عندنا مثلا الصالة واسعة نوعا ما، لكن العفش مضيقها،

معظم الوقت طالما مفيش ضيوف بنبقى حاشرين العفش على الجنب، وعاملينها ملعب كورة .. كمان ترابيزة السفرة تقريبا مش بنشيل شبكة البينج بونج من عليها.. #الحب_إنفاق_مما_نحب

27- اوعي تفضحيه قدام أي حد.. سواء غِلط أو ما غلطش.. غِلط

--- يعني عمل مشكلة.. ما غلطش---يعني مجرد موقف يكسف ومضحك أو سر معين قالهولك وهيزعل لو حد عرفه..

احترمي كرامته وسِتره وخصوصيته.. علميه إنك صندوق أسراره الأمين. #الحب_احترام_وستر

28- اسأليه عن أحلامه وخواطره وبيفكر ف إيه ورأيه إيه ف أمور الدنيا المختلفة.. رغي في رغي يحس من خلاله إنه مهم عندك وإن الحوار معاه غاية عندك.. مش حاجة بتهربي منها وحمل تقيل على قلبك. #الحب_حوار

29- لو كلكم بتتكلموا في حوار جماعي أو قعدة جماعية مثلا إدوله دور يتكلم و محدش يقاطعه.. #الحب_توقير_وإنصاف

30- لماياخد بإيدك عشان عاوز يوريكي حاجة معينة وعنيه بتلمع كدة، روحي معاه واعملي رد فعل سعيد لإنه نفسه يشوفك فرحانة منه .. #الحب_جبر_خواطر

31- لما تغلطي في حقه تربويا أو تظلميه أو تسرفي في عقابه والغضب منه أو... إلخ، امسحي أول بأول.. بوسة-حضن-تشجيع-دعوة حلوة-حوار اعترافات وقورة مفيهاش الابتذال الغربي ...الخ، #الحب_مصارحة_واعتذار

خصصيله وقت مخصوص ليه لوحده تقعدوا فيه سوا في هدوء تشربوا شاي وتخططوا و تتفقوا و تحلموا وتضحكوا و تتصاحبوا....الخ

وليكن مثلا بعد الفجر ولو ربع ساعة، أو بعد العصر أو قبل المغرب.. دة في حالة إنه أكبر إخواته مثلا وبدأ يعقل أمور كتير.

33- احكيله قصة قبل النوم، أو وسط اليوم حتى، من قصص صغيرة واعملي أصوات وإخراج سينمائي بصوتك.. #الحب_إمتاع

34- وهما بيخشوا سرايرهم غطيهم واحضنيهم وبوسيهم ..
. #الحب_خوف_وإشفاق ..

35- حطيله مفاجآت في محفظته.. قلب مكتوب عليه حموزي حبيبي مثلا، شوكولاتاية مثلا... ابعتيله رسالة عالموبايل يوم امتحانه ربنا معاك يا حبيبي.. #الحب_مفاجآت..

منها بيتعلم الحب والاهتمام، ومنها بتكسبي مكانة ف قلبه كالجبال الرواسي.. حسسيه إن سعادته غاية عندك وهدف بتخططيله. #الحب_إبهار

36- اوعي تخلي أي أمر دنيوي -مش ديني- يبوظ علاقتكم ببعض، بالذاااات المذاكرة.. هنتكلم عن دة ان شاء الله في #العيال_والمذاكرة .. #الحب_أولويات

37- كل ما تقع تحت ايدك مثلا صورة او نكتة او فيديو معين انتي عارفة ان ابنك بيحبه، شيليه على جنب وفرجيهوله وقوليه انك شايلاهوله مخصوص عشان بيحبه ❤❤...

مثلا فيديو جون أسطوري لو هو مهتم بالكورة، او فيديو الكوارث الطبيعية لو هو عاطفي بزيادة 😂😂، او صور نكت عفيفة مافيهاش ابتذال لو هو مغرم بالنكت. #الحب_إسعاد

باختصاااااااار: حبوا ولادكم.. وعبروا عن دة بصدق ❤❤❤

🌱🌱🌱حبيبتي الحياة قصيرة.. والولاد بيكبروا بسرعة، وقوة طردهم بعيد عنا أقوى من قوة جذبنا ليهم.. فلازم تركزي..

🌱🌱🌱هتقوليلي أنا لوحدي وزوجي كذا وكذا وعامل لي إحباط ومش بيساعدني؟

هاقولك ابدئي صفحة جديدة مفيهاش تمحور حوالين الزوج، ياما أمهات نجحوا لوحدهم، بل ياما أمهات نجحوا في وقت الأب كان عامل هدم شرس كمان..

خليكي أم ذكية: تستغل البيئة السيئة المفروضة على ابنها، في تربيته على الاستقامة وتنفيره من الفساد.
رد مع اقتباس
 

أدوات الموضوع
انواع عرض الموضوع

الانتقال السريع

قد تكون مهتم بالمواضيع التالية ايضاً
الموضوع
الشبشب و اصول التربية الحديثة
الفراولة المثلجة
فضيحة كبرى لوكيلة وزارة التربية والتعليم بالقاهرة بشأن تدريس الدين المسيحى وبلاغ لوزير التربية والتع
كيفية تكوين علاقات ناجحة في ظل المتغيّرات الحديثة؟
طريقة عمل القهوة المثلجة


الساعة الآن 01:56 PM


Powered by vBulletin® Copyright ©2000 - 2024