حاجات كتير جوا كل واحد فينا

[walaa farouk]

الكلام اللي مش بيتقال والرسايل اللي مش بتتبعت والصدف اللي مش بتحصل
وضحكتهم في الصور اللي بنفضل باصين لها كتير أوي واللي عاملين نفسهم عايشين حياتهم
وهم بيتنفسوا بالعافية كل الحاجات اللي عوُزناها وما عازتنا
والحاجات اللي كانت عايزانا وما شوفناهاش اصلاً رنة التليفون اللي بتقبض قلبك
ومش بتطلع من اللي انت مستنيه

و كل " ياريييت " اللي بنقولها من قلبنا كل المرات اللي كنا محتاجين الدُنيا تنصفنا و ما نصفتنا
وكل مرة قلنا " تمام و زي الفُل " واحنا متأكدين ان احنا مش تمام خالص
و الأيام اللي عيطنا فيها في العلن عشان الزعل كان أكبر أوي من إننا نخبيه المره دي
كل الحاجات اللي اتخلينا عنها عشان مامسكتش فينا

الناس اللي كان نفسنا نحضنهم و ماقدرناش كل الحاجات اللي فجأة اختفت
والحاجات اللى مالحقنا نشبع منها كل المبررات العبيطة و الحجج الفارغة
اللى بيوجعوا اكتر ما بيداوا والإحتياج لحاجات عمرها ما هاتيجي
كل الكذب اللي كذبناه على نفسنا و صدقناه علشان ما نكرههمش
كل اللي كانوا هنا و مشيوا كل مرة كنا فيها لوحدنا من غير سند
أنا ما أعرفش الحاجات دي تصنيفها ايه
لكن كل اللي اعرفه إن كل ده جوا كل واحد فينا إحنا شايلين كتير أوووووى