ملف كامل للصلوات السهمية المجمعة

[walaa farouk]

يارب إديني أنسى التفاصيل
اللي بتعدي على بالي فجأة وتخبط في قلبي
أنسى اللى جرحوني من غير ما أقسى
.. واللي مشيوا من غير وداع من غير ما أستنّى

[walaa farouk]

يارب خلّي قلبي مايفضلش يفتح الصفحات القديمة
ومايتعلقش بصورة جوّا عقلي مش موجودة في الحقيقة

أنا مش بطلب أهرب من ذاكرتي ..
بس بطلب راحة .. وسلام ..
ونسيان يشفي مش بس يبعد

[walaa farouk]

يارب ابعد عني كل اللي بيشوش عيني عنك
كل صوت عالي بيغطي على همسك
كل فكرة بتغرّيني أخلّي إيدي في إيد حد غيرك

[walaa farouk]

يارب ابعد عني الحاجات اللي بتسحب قلبي بعيد
حتى لو كانت شكلها حلو.. بس بتسرق مني سلامي
خلّي بصري ثابت عليك،
حتى والعاصفة حواليا بتزعق

[walaa farouk]

علّمني يارب أشوفك في الريح،
وفي الموج العالي
وأصدق إنك واقف جنبي حتى لو مش شايفك
أنا مش طالب تهدي العاصفة
أنا طالب ماتسيبنيش أغمض عيني عنك فيها

[walaa farouk]

يارب أصلح لي حالي واهدِى حيرة قلبي
وفاجئني بما يجبر خاطري يا الله
فرح قلبى الذى تعب من أحزانه
قوينى يا الله فبقربك تحلو حياتى

."

[walaa farouk]

يارب ضع يدك على اولادنا وبناتنا .
شيل كل خوف وتوتر
امنح نصح وارشاد وتركيز ومعونه فى وقته

[walaa farouk]

حاوطني يارب بناس طيّبة،
ناس سويّة، صادقة، مُريحة، وقلوبها نضيفة…
ناس وجودهم يطمنّي، وكلامهم يريحني،
وغيابهم ما يوجعنيش.”

[walaa farouk]

يا رب، ابعد عني كل زيف في صورة حب،
وكل كلمة فيها نية مش صافية،
وكل علاقة ظاهرها خير وجوّاها استنزاف.”

[walaa farouk]

يارب ازرع حوالينا ناس من عندك،
ناس شبه حضنك، شبه سلامك، شبه نعمتك.