خلي بالك من اللي بتدخله لعقلك

[walaa farouk]

الحرب الروحية مش فكرة غيبية
أو حاجة بنسمع عنها في العظات وبنعدّيها.
دي واقع يومي بنعيشه،
بس أوقات بنكون مش واخدين بالنا.
مش كل مكان تروحه آمن لروحك،
ومش كل علاقة تنفعك حتى لو شكلها لطيف.
في ناس وجودهم حواليك بيطفي النور جواك،
وفي أماكن بتسرق سلامك وانت مش واخد بالك.
الحرب الروحية مش بس ضد الخطيّة،
دي كمان ضد التشتّت، والتساهل،
والتعوّد على اللي يبعدك عن الله.
انت روح قبل ما تكون جسد،
ولو فقدت يقظتك الروحية،
هتلاقي نفسك بتتسحب بعيد عن اللي يحييك.
خلي بالك من اللي بتدخله لعقلك،
من الفيديوهات، للكلام اللي بتسمعه،
للناس اللي بتديهم ودنك وقلبك.
في حاجات بتبنيك،
وفي حاجات بتهدّك بهدوء وانت مش حاسس.
افتح عينيك.
دي مش حياة عادية.
دي معركة.
وسلاحك الحقيقي هو صلاتك، كلمته، وعلاقتك الصادقة بيه.