انا وانت وانتي و كلنا عبارة عن Secret Santa

[Ramez5]

زمان لما ولادي كانوا لسة صغيرين .. كانوا بيستنوا وقت الكريسماس بفارغ الصبر و يفرحوا اوي لما نعمل الشجرة و نزينها و يقوموا يوم ٢٥ ديسمبر بدري جدا من النوم و يروحوا جري علي الشجرة علشان يشوفوا سانتا كلوز جابلهم ايه هدايا و سابها تحت الشجرة ☺️
فرحتهم بالهدايا وان في حد جميل جاب الهدايا وان الحد ده كان عارف هما نفسهم في ايه و عايزين ايه بالظبط و راح جابهلهم .. بيخليهم طايرين من الفرح و كانوا بيقولوا لينا ان سانتا كلوز دا جميل اوي علشان جاب لنا اللعب اللي كان نفسنا فيها 😍

طبعا كانوا لسة صغيرين وميعرفوش ان احنا اللي بنشتري الهدايا دي و اننا عارفين هما نفسهم في ايه و بنجيبه ليهم

كلنا و احنا صغيرين كنا بنستني هدايا العيد و نفرح بيها و نحس ان في حد مهتم بينا وبيحبنا و حتي بعد ما كبرنا برضو بنفرح لما حد يفتكرنا بكلمة حلوة او بمعايدة طالعة من القلب او بمشاعر جميلة محتاجنها .. بنحس ان ربنا بيطبطب علينا و بيوصل لينا حبه لما بنحس بمحبة الناس اللي حوالينا و اهتمامهم بينا ..

انا وانت وانتي و كلنا عبارة عن Secret Santa لبعض .. ربنا بعتنا لبعض علشان نفرح بعض و نحب بعض .. علشان نطبطب علي بعض و نهتم ببعض .. احنا قلبه اللي بيحب و بيهتم بيه و احنا أيديه اللي بتقدم خير و فرح و معونة و طبطبة لغيرنا و احنا رجليه اللي بتجري علي غيرنا لما يحتاج مساعدة او لما يكون في ضيقة .. احنا منه و هو فينا و ساكن جوا قلوبنا و بيعمل بينا كل اللي عايز يوصله ..

„لِأَنَّنَا نَحْنُ عَمَلُهُ مَخْلُوقِينَ فِي ٱلْمَسِيحِ يَسُوعَ لِأَعْمَالٍ صَالِحَةٍ قَدْ سَبَقَ ٱللهُ فَأَعَدَّهَا لِكَيْ نَسْلُكَ فِيهَا.“
**أَفَسُسَ‬ *2:10‬ *

ماريان عادل