ما تراهنش علي زعل الناس

[walaa farouk]

تزعل و تصالح يعني تكسر قزاز و تلم الكسر و تلزقه تاني..

اول مرة ممكن يرجع ، لكن بعد مرة و مرات اللي اتكسر ما بيرجعش زي الأول..

النفس بتتجرح و تسيب ندبات عميقة ما بتقولهاش لا ليك و لا لغيرك و لا حتي لنفسها..
النفس الحساسة بتنكسر و تنزوي و تبعد ..

الناس يمكن تصالحك، لكن بتحط بينها و بينك حواجز نفسية غصب عنها،
و تلاقي ثقتها فيك تقل ، و قربهم ليك يخف و كلامهم معاك يبقي دلِع ما لوش طعم..

اوعي تراهن علي زعل الناس ، و اوعي تسترخص مشاعرهم ..

مشاعر الناس ده كنز حافظ عليه ، لأن اهم راسمال ليك في الدنيا حبهم ليك ..

لو خسرت حد راجع نفسك معاه بصراحة ، و الناس لما بتلاقي كلامك صادق و حقيقي،
و اعمالك الحلوة تأكد كلامك الجميل ..

كده علاقتك بالكل تتشفي بجد، و ما يبقاش مجرد "صلح" شكلي
، يبقي "مصالحة" حقيقية و علاج و دواء..