المحسوكين

[walaa farouk]

زمان كنا بنكتب بالأقلام الحبر.. و كان عندنا زميل خطه حلو جدا وكأنه خطاط ،
لكن بسبب وسوسته كان بعد ما يكتب الصفحة، يقعد يعدل النقط و التشكيل بالأستيكة
و أحياناً بالموس لغاية ما يلخبط و يشوه اللي عمله كله ، و يضطر يعيد الصفحة اكتر من مرة ..

و ده تعريف الحسوكة..
مفيش كلام أن الدقة حلوة ، اللي فيها نعيد و نراجع مرة او اتنين
، لكن "الحنتفة" ، اللي بتخلينا نعيد و نزيد،
و نكرر الحاجة لغاية ما نقلب عاليها واطيها و نبوظها، هو ده الموضوع..

ناس كتير بتعمل كده في شغلها، و علاقاتها و كلامها و في تفكيرها :
تعيد و تكرر و تزود و تشيل و تحط و تعدل و تحفر و تردم..
و في الاخر بسبب الدقة الزايدة تخسر الناس ، و تتعب عقلها، و تعطل شغلها..

و الحل ؟
اقبل أن مفيش حاجة ١٠٠ في ال ١٠٠ ،
فوت التوافه اللي ما حدش واخد باله منها إلا انت ؛
بطل تعيد و تزيد في كل كلمة و كل فكرة لحسن تتعب نفسك و تتعب الناس و يبعدوا عنك ..
و افتكر درس "نعم نعم و لا لا " (مت ٥ : ٣٧) اللي فيه المسيح علمنا الوضوح و الحسم ..
و افتكر كمان أن اي حاجة زيادة عن حدها بتتقلب ضدها..
مش كده و لا ايه ؟؟