عبء الإلتزامات ..

[Rena Jesus]

من مشاكل الحياة ما يسمي بالـ(إلتزامات) ،
من ساعة ما الإنسان بيتولد و إلتزاماته بتتولد معاه .. فهو ملتزم بشكل معين ، سلوك معين ، هدف معين ،،
حتي الخيال هو ملتزم بحدود معينة لخياله ده !
و طبعا إلتزام الولد غير البنت ، الفقير غير الغني ، الصغير غير الكبير ..
و مع كل مرة بيزيد إلتزام جديد علي الإنسان بيحس بحاجة زي عبء نفسي تقيل كفيل انه يقتل اي طموح او أمل جواه ..
و كأنه كان في لعبة معينة لكن فجأة طلع قانون جديد يمنعه من حركه هو بيبقي سعيد لما بيعملها فيحد من طلاقة ممارسته لللعب !

في اللحظة ديه ، بيبتدي الإنسان يجبر نفسه انه يتأقلم علي عبء الإلتزامات ..
و ضمنيا بيصل لقناعة شبة نهائية انه ميعشمش نفسه تاني انه حيستمتع باللعبة !
عشان لو فجأة ظهر قانون رخم جديد يكون عامل حسابه و ميدوقش طعم الإحباط ..
بس ساعات بيظهر جوا الإنسان صوت متمرد يقوله طب ما تهدي اللعب شوية و تفكر في الألتزمات ديه ،
مش عمال تلتزم تلتزم و انتا اصلا من محتاج الألتزمات ديه ؟! ..
بنسبة 99% الإنسان بيكتم الصوت المجنون ده و يكمل في طريقه عادي خالص ، بس بنسبة 1% بيقعد فعلا يفكر و يراجع مع نفسه منابع الإلتزمات ديه و اللي بيكتشف ان اغلبها من صنيعة المجتمع اللي مينفعش يمشي قطيع البشر ديه كلها من غير ما يكون في اصلا مفهوم الـ(الإلتزامات) ! ..

فيبقي من اشرس قرارات الإنسان ساعتها هو التنازل عن المفهوم ده ، هو انه يتحرر من قيود اتعملت له من ناس ابعد ما تكون فكره او حقيقته ، انه يختار يكون بس اللي هو عاوزه و يلتزم بس باللي فعلا مصدق فيه !! ..
ساعتها بيدرك ان في حاجات لازم تخسرها عشان تكسب قصادها حاجات اقيم و اغلي ..
بيعيش عمق مفهوم ذاتية الفرد و التحمل الواعي للمسؤولية ....
بيقضي حياته و هو معندوش شكل معين مرعوب ليخسره او قالب سلوكي ثابت خايف لاحسن الناس تعيب عليه لو خرج براه ..
بيدوق طعم الحرية الناضجة و يحس بمدي قوة الإختيار الإنساني .
ساعتها بيتعلم يلعب عشان ينسبط و يستمتع .. عشان لذة الحياة .. عشان نفسه ،
.. أصل مفيش احلي من اللعب و انت مستبيع