عاشق الاضواء

[walaa farouk]

بيحب اي مكان ينور عليه هو بس ،
لو النور جه علي اي واحد غيره بيموت من الغيظ و الحقد..
ما يعرفش يقعد ساكت ، لازم يتكلم في اي مكان
علشان يثبت للناس أنه الاحكم و الاعلم و الاظرف ..

يموت في المكرفون لأنه بيخليه في بؤرة اهتمام الكل ،
و ما يعرفش يقعد ساكت و هادي ابدا.. يحب الناس تشاور عليه و تتكلم عنه طول الوقت ،
و يعشق المدح و التسقيف و التطبيل ..

لو اتكلمت علي اي حد غيره قدامه يبقي زي المسعور،
و يوريك ابتسامة صفرا و يمكن يثور عليه و عليك و علي الكل بسبب غيرته..
بيعمل متواضع علشان يكسب مديح اكتر ، و الكبر ح ينط من عينيه ..

مسكين ، بيعذب الناس و بيتعذب جواه من عشق الظهور و عبادة الاضواء..
اصله ما داقش القلب الابيض السوي و ما يعرفش أن الحب دوا ،
و أن اللي بيحب الناس متهني، و أن اللي بيجري من النور و الظهور الكرامة بتجري وراه،
و الناس بتحطه جوه عينيها ، و أن اللي بيجري علي الكرامة بتهرب منه
و تخللي الناس تحتقره و تطفش منه