حاجات الواحد اكتشفها بعد الثلاثين 😂😂

[walaa farouk]

.


١- ان القعدة في البيت بالبيجامه أحسن من اجدعها خروجه.
٢- ان شنطه الخروج لا يمكن تخلي من اَي مسكن لزوم الصداع
٣- ان النوم ده نعمه كبيره فكره ان الواحد يحط رأسه علي المخده و ينام من غير قلق او الم.
٤- ان الصحاب مش بكترهم و فكره الشله دي يعني حوارات كتير.
٥- ان مش كل حاجه تعبنا فيها كان ليها لزمه.
٦- ان عمرنا ما نحكم بالشكل ، العشره و المواقف بس هي اللي بتبين.
٧- ان المعاتبه دي مجهود ذهني و نفسي جبار مايتعملش غير للناس العزاز و العزاز اوي كمان ،
اما الباقي فابتسامة عريضه و بيتقالوا انت صح.
٨- ان الوقت و العمر اللي عدي مش هيجي اده فلازم يستغل عدل و منغير زعل
و لا حرقه قلب علي حاجه او علي حد
٩- ان اللي موقفش جنبك في حزنك صعب يلاقي مكان في حياتك.
١٠- ان الواحد مايخودش كل حاجه علي أعصابه و ان الدنيا مش مستاهله.
لأن بجد في الاخر كله بيعدي و اللي بيفضل وش باين عليه الهم و شعر شاب....