قواعد التعامل مع البنات

[walaa farouk]

- البنت مابتحبش تشتري لبس منتشر وفيه ناس كتيرة بتلبسه عشان تتميز عن الباقيين .. و ده معناه إنك "لو لا قدر الله" فكرت تشتريلها لبس هدية روح اشتري درع روماني عتيق او زي خفاش بس يكون بينك
- البنت عايزاك تعرف هي عايزة ايه و من غير ما تقوله .. والا هتبقي غبي او مش مهتم
- شعر البنت مهم جدا ً ولازم تلاحظه و تاخد بالك من اي تسريحة جديدة عملتها حتي لو كانت مجرد انه متنعكش !
- البنت مابتتخنش إطلاقا ً .. الجاذبية الأرضية هي اللي بتضطهدهم
- البنت عندها قوة ملاحظة و تقدر تشوف عينة الـ dna اللي بنت تانية سابتها علي هدومك و بالعين المجردة !
- لو بنت سئلتك (قولي بصراحة .. كنت بتحب واحدة تانية قبلي ؟!) .. إياك ترد عليها بصراحة .. الباب ده لو اتفتح هاتقعد بقيت عمرك بتحاول تقفله والرد الصحيح في مثل هذه المواقف هو : حبيبتي أنا قبل ما أعرفك أصلاً كنت مجهول ..
- البنت لما بتمشي بتتحرك بخطوات بطيئة ولو عايز واحدة تمشي بسرعة قولها ان فيه تخفيضات علي أول الشارع !
- البنت عندها أسماء تانية للحاجات غير المتداولة بين سائر البشر .. يعني الكلب اسمه بوبي .. و الهدية اللي انت جبتها في عيد ميلادها اسمها العك اللي انت جبته
- البنت ماتقدرش تشيل اي حاجة الا اذا كانت هاتحدفها عليك
- البنت علي طول زهقانة حتي لو خدتها في جولة حول العالم وخضت معاها مغامرات مخضهاش ادهم صبري في حياته .. دايما ً البس تحت هدومك لبس أراجوز و ابتدي اتعلم ازاي تحول التفاحةة لخاتم
- لما بنت تتكلم حاول -مع ان ده شبه مستحيل- تركز في كل اللي بتقوله لان البنات عندهم مقدرةة مذهلة يقولوا معلومات مهمة وسط الكلام .. يعني عادي تلاقي بنت بتقول : رحت أشتري الشنطة مالقتش لون التوكة اللي انا عايزاها فسئلت علي الموز لقيته أغلي من بتاعة اللبن اللي علي أول الشارع و طلعت مرات صاحبك بتخونه مع جوز أختك فعديت علي بتاع السمك و جبت من عنده أربع بيضات و هناك لقيت شراب فيليه ..!
- البنت بتتعامل مع الطقم الصيني علي انه آثار نادرة لا يصح استخدامها الا للطوارئ .. انت كمان لازم تتعامل مع النيش علي انه مقبرة فرعونية لو دنستها هتجيلك لعنة الفراعنة
- البنت مابتعرفش تسوق .. مش ذنبها أطلاقا ً انك ماشي في الشارع
- البنت مابتحبش الولد اللي بيكدب .. الاستثناء الوحيد اللي ممكن تعديه لما هي تقولك : قولي كلام حلو
- من حق اي بنت تقول علي اي ممثل انه امور في حين انه لازم يتطبق عليك الحد لو شفت ممثلة و قولت عليها حلوة
- علاقة البنت بالتليفون هي نفس علاقتك بالكورةة
- أي حلم بتحلمه أي بنت له دلالة ودايمًا التفسير حاجة من اتنين .. يا انت ماشي مع واحدة تانية .. يا واحدة تانية ماشية معاك
- البنت لما بتضايق بتضحك و لما بتفرح بتعيط ولما بتقعد في البيت بتبقي عايزة تخرج ولما بتخرج بتبقي عايزة تروح ولما بتحس ان جالها برد بتعمل كل اللي ربنا يقدرها عليه عشان تعديك
- انت بتستحمي بصابونة لكن البنت لا .. البنت عندها ٩٢٣٤٣ مستحضر تجميل لو حاولت انت تجربهم هاتبوش او هتتحول لضفدعة
- البنت لما تقولك استناني خمس دقايق يبقي انت عبيط عشان مجبتش معاك حاجة تنام بيها
- البنت تحب الراجل اللي يحكمها .. عشان تجيبه و تمشيه علي العجين بعدهاا .. هو ده التحدي