انواع الغضب عند الاطفال

[Rena Jesus]

مين فينا مش بيتضايق اما يلاقي ولاده حاسين بالغضب و بيتأففوا بسبب حاجة حصلت؟
للأسف اغلبنا بيبص للغضب على انه حاجة سلبية و ميعرفش انه احدى عوامل النمو العاطفي


في انواع للغضب حسب تقسيمة علماء علم النفس:
1- Anger at self - الغضب من النفس
اما ميذاكرش كويس فيجيب درجة وحشة او اما مش يدرب كفاية ففريقه يخسر.
الغضب هنا مؤشر صحي لأنه قصر تجاه حاجة و مش راضي عن ادائه و حاسس بالذنب.
مش دورك خالص انك تكبت فيه الاحساس ده عشان خايف عليه ولا انك تبالغ في لومه لحد ما يوصل الاحساس بالذنب لدرجة الألم و كره النفس.

2- Anger at other - الغضب من الأخرين
اما حد يأذيه او ياخد حاجة تخصه.
لازم تتأكد من رد فعله و تعلمه وسائل يعبر بيها عن غضبه و ياخد بيها حقه.
لكن انك تمنعه من الشعور بالاستياء -عشان يبان انه متسامح و متربي- بيخلي شخصيته ضعيفة و بيقبل بالظلم مستقبلا.

3- Disappointment- خيبة الظن
اما ابنك يتمنى حصول حاجة و متحصلش فيحس بالاحباط. و في الغالب مش بيكون ليه ايد في الموضوع فبيحس بالحزن و بيبقى ناقم على الاحداث. احنا الكبار بنتعرض لمواقف محبطة طول اليوم فمن حق الولاد انهم يعبروا عن استيائهم براحتهم و انهم يلاقوا منك تفاهم و تعاطف. ده شعور صحي جدا و ملوش اي علاقة بالدلع.

4- Constructive anger- الغضب البناء
ده بيفرق من طفل للتاني حسب مبادئه و ايه اللي بيثير غضبه من السلوك اللي حواليه. استغل الغضب ده كويس اوي و علم ابنك انه يكون مبادر و يحل المشكلات بشكل ايجابي. فهمه انه عايش وسط مجتمع و من حقه يتضايق و يشارك الناس بعدم رضاه عن سلوك معين.

يا ترى لسه شايف الغضب على انه شيء سلبي محتاج تدخل و منع؟

[walaa farouk]

ميرسي على مشاركتك الجميلة رينا

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[Rena Jesus]

ميرسى لمرورك الغالى