ماتخلوش احتياجاتكم تبهدلكم💔

[walaa farouk]

بكل اسف بنشوف كل يوم ناس.. بنات وأولاد زي الورد.
. رجالة وستات زي الفل.. احتياجاتهم مبهدلاهم..
جايباهم يمين وشمال بلا اتزان.. مودياهم آخر الطريق للبحر
.. ومرجعاهم عطشانين.

في الحقيقة مش احتياجاتهم هي اللي مبهدلاهم.. الاحتياج للحب والاهتمام والقبول والاحترام ده شيء طبيعي وفطري ومطلوب
.. المقصود هو كيفية تعاملهم مع احتياجاتهم.. عدم الصبر عليها.
. رفض تحمُّل عدم إشباعها لفترة من الزمن..

وده يخليهم - وبكل أسف- يتسرعوا أحيانًا.. ويتنازلوا أحيانًا.. ويتجاهلوا أحيانًا.. كل علامات الإنذار والإشارات الحمراء..
وفي الآخر.. يتبهدلوا..

مش علشان إنتي محتاجة تتحبي.. تروحي لحد أقل من اللي تستاهليه.. وتكملي معاه.. وإنتي حاسة طول الوقت من جواكي إن فيه حاجة ناقصة....الحاجة الناقصة دي ماحدش هيكملها.. لا انتي.. ولا هو.. ولا الزمن..

مش علشان إنتي محتاجة تتقبلي.. ترضي إنك تبقي مع حد عمَّال يقولك أنا عندي مشاكل.. أنا مش بتاع ارتباط.. أنا مريض.. أنا تاريخي سيئ.. وانتي بينك وبين نفسك تقولي: أنا اللي هاغيره.. أنا اللي هاصلحه..
تغيير نفوس الناس مش شغلتك.. إصلاح مجرمي العلاقات مش وظيفتك.. علاج النرجسيين والساديين والسيكوباثيين مش تخصصك.

مش علشان محتاجة تتشافي وتتقدري.. تروحي برجليكي للي يستغلك.. ويستبيح نفسك وروحك.. وأحيانًا جسدك.. وأحيانًا مالك... في مقابل فتات الشوفان.. ورائحة القبول...هتلاقي نفسك بعد شوية.. وحيدة.. جريحة.. خاسرة لكل شيء.

مش علشان مفتقدة الإحساس بالأمان.. تدخلي علاقة مع حد يضحك عليكي - وتبقي حاسة إنه بيضحك عليكي- ويطلع بيكي السما - وتبقي عارفة إنك هتنزلي على جدور رقبتك - في مقابل أمان جامد زائف.

الأمان الحقيقي شعور داخلي.. ماحدش بيمنحه لحد.. ماحدش بيحسسه لحد.. لو ماطلعش من جواكي إنتي، مش هيطلع ولو مع مين.

ماتخليش احتياجاتك تبهدلك..
بلاش احتياجاتك تخليكي تبدئي علاقة مش واضحة
.. مش متكافأة.. مش واقفة على أرض صلبة.. غير متزنة..

اصبري.. اقبلي.. استحملي الجوع والعطش شوية..

وأنت كمان.. ماتخليش احتياجاتك تبهدلك..

مش علشان محتاج تحس بوجودك وسط ناس مش شبهك.
. تدفن نفسك.. وتشوه فطرتك.. وتغير طبيعتك
.. وتبقى حد ماتعرفوش.. وتعيش في غربة عن نفسك طول العمر..
أحيانًا بيكون عليك إنك تختار: تخسر نفسك وتكسب الناس
، ولَّا تكسب نفسك وتخسر الناس؟

مش علشان محتاج تتقدر.. توطّي راسك.. وتحني ضهرك..
وتقول وتعمل عكس اللي جواك.. في انتظار رضا مَن لا يرضى..
اللي مابيرضاش.. عُمره ما هيرضي.. وهيفضل ضهرك محني.

ومش علشان موجوع من كل الاحتياجات دي..
ومتألم من قسوة إلحاحها.. ومحروم من تلبيتها بشكل صحي وسَوِي.. تقوم تفصل مشاعرك.. وتغيّب وعيك.. وتهرب لأقرب حضن كيميائي مريح.. ولا هو حُضن.. ولا هو مُريح..

إحنا بنوعى باحتياجاتنا علشان نقبلها..
بنتعرف عليها.. علشان ندي نفسنا الحق فيها..
بنحس بيها، علشان نتعلم نتعامل معاها إزاي..


لكن محتاج أتشاف.. فأدفع رشوى نفسية لحد؟ لأ..💔
محتاج أتحب.. فأقدم نفسي على طبق من دهب لحد؟ لأ..💔
محتاج أُتقبل وأتقدر وأُحترم.. فأقطع إيديا ورجليا ورقبتي وأوزعهم على خلق الله؟ لأ..💔


خليكي فاكرة:
مش علشان جعانة.. تروحي تاكلي من صندوق الزبالة..
وخليك فاكر:
مش علشان عطشان.. تروح تشرب من مية البحر..

ماتخلوش احتياجاتكم تبهدلكم..

#الخروج_عن_النص