إستثمر لحظات قرفك بنفسك صح

[walaa farouk]

قابلني في الشارع و قال لي أنا لسه ملحد و مش مصدق في وجود ربنا بس عايز أعترف لك بحاجة " أنا قرفت من نفسي " أنا عملت كل حاجة تتخيلها ووصلت لمرحلة إشمئزاز من نفسي و قرف .. هو الإحساس ده ليه ؟ مع إني مش مؤمن بربنا زيكم !!

قلت له بس ربنا خلق جوانا سيستم .. السيستم ده كدة لما بنعك و نسئ للجهاز بتاعنا اللي بيحوي جسدنا و نفسيتنا و روحنا بنحس إن فيه حاجة مش مظبوطة ولو تمادينا بنحس بقرف و عك و إشمئزاز .. أقولك علي حاجة إنت صادق جداً لإنك وصفت اللي جواك بشجاعة حتي لو مش ناوي تسيبه ..

قال لي و إيه العلاج ؟
قلت له المسيح
المسيح كان وهو علي الأرض بالجسد بيخصص وقت لنوعياتنا دي لما نوصل لمرحلة إننا قرفانين من نفسنا .. لدرجة إنهم هاجموه قاله ده بيروح يتعشي مع الخطاة و الزناة و العشارين .

طب وهو كان رد فعله إيه ؟
قالهم الخطاة دول اللي إنتوا شايفين نفسكم أبر منهم هيسبقوكم للسما ..

إزاي ممكن تفهمني ؟
لإنهم صادقين زيك و كانوا بيروحوله يقولوله زيك و زيي إحنا قرفنا من الخطية و البعد و كان بيقبلهم و هما كانوا بيتجاوبوا و يمشوا معاه سكة تغيير و يقرروا يتبعوه و يبتدي إحساس الخزي يتبدل بإحساس القبول و الحب و الفخر .

صدقني الأوقات اللي بنكون فيها قرفانين من نفسنا .. دي أوقات قياسية قرعات قوية علي أبواب قلوبنا بتقولنا المسيح مستنيكم يلا إرجعوا عيشوا حياة تستحق تتعاش كفاية خزي .

و إبتدا بالفعل من إحساسه بالقرف من نفسه يكون دي بداية قربه و رحلته مع ربنا .. كل محاولات العقل و الجدالات العقلية حول ربنا موجود مجابتش نتيجة لكن إحساسه بخزي الخطية إبتدي يبكته إنه محتاج يسترد إنسانيته اللي فقدها من جديد و يرجع لله اللي مكتوب عنه إنه بيرد نفوسنا .

يَرُدُّ نَفْسِي. يَهْدِينِي إِلَى سُبُلِ الْبِرِّ مِنْ أَجْلِ اسْمِهِ." (مزمور 23: 3).

ارْجِعُوا إِلَيَّ، يَقُولُ رَبُّ الْجُنُودِ، فَأَرْجِعَ إِلَيْكُمْ، (زكريا ١)

إستثمر لحظات قرفك من نفسك و من الخطية و إستغلها صح ، دي اللحظات اللي حولت ناس كتير من مذنبين لقديسين عظماء .