هذا السر عظيم

[walaa farouk]

هذا السر عظيم ..

ده وصف الكتاب للزواج (افسس ٥) ..

عظيم لانه سر اعجازي لا يصنعه أحد سوي الخالق تبارك اسمه ..

ازاي تخلي اتنين يعيشوا مع بعض و يحبوا بعض و يتحملوا عيوب بعض و يسامحوا بعض كل العمر ده رغم كل الخلافات الممكنة، ده السر اللي ربنا بيحطه في الزواج ..

المعجزة دي عمل الهي ، يصنعه في شريكي الحياة مش بس يوم الاكليل، كل ساعة و كل يوم بعده ..

عاوز تعرف ازاي مفعول المعجزة دي يكمل ؟؟ لو اطعت الله في تصرفاتك ، و اكرمته في شريك حياتك ..

غير كده ، أول ما تغضب الله ، تلاقي البركة اتحاشت ، و النعمة مش عارفة تشتغل ، و مفعول السند الإلهي يقف ..

عاوز ترتاح و تريح ، أعرف أن النجاح في زواجك سر الهي لو ما اتسترتش به و احتميت ببركته و لا نصيحة ح تنفعك و لا مشورة ح تجيب نتيجة ..

السر ده ربنا بيسلمهولك في الزواج ، بركة تحافظ عليها ..

حاسب لا بركة السر تتاخد منك ، كل ما تغضب الله و تزعله منك سواء بينك و بينه أو و انت بتتعب شريك حياتك ..

ح تلف حوالين نفسك و انت مش عارف جوازتك عطلانة ليه ، لغاية ما تكتشف أن سر البركة اتاخد منك ..
و ساعتها مفيش حل غير انك تصلي لربنا : رجعلي مفاعيل سر بركة الزواج في حياتي ..