افكار للعطاء اليومي بعيدا عن المتسولين

[walaa farouk]

روح للمحلات الصغيرة والبياعين الي محلاتهم مفيهاش بضاعة كتير واشتري منها ، حتى لو أغلى من محلات الهايبر ، المشوار والبنزين والحاجة الي هتشربها أو تاكلها في المول أكتر بكتير من الكام جنيه الي هتوفرهم من العروض .
- عمال الدليفري الي بيلفوا في عز البرد ده ، زود البقشيش شوية لإن مرتباتهم ضعيفة جدا وبيعتمدوا تماما على البقشيش . ولو تقدر تديله حاجة سخنة يشربها وهو ماشي يبقى كتر خيرك
- زودوا أجر عاملات النظافة بالبيوت ولو فيه أكلة حلوة شافتها وهي بتنضف التلاجة اديها منها.

- عمال البنزينات ، حتى لو عربيتك بتبرق وقالك أنضفها سيبه يلمع الإزاز واحتسبها صدقة ، والي بيحط البنزين ملوش دخل أصلا غير البقشيش ، أنت بتدفع أكتر بكتير في زيادة البنزين فمش هتفرق بقشيشه.

- عمال السوبر ماركت الي بتحط الحاجة في الأكياس ، لما يعزم عليك يوصلها العربية وافق حتى لو كيس بسيط قوي واديله بقشيش كويس متحسبهاش أنت محتاجه يوصلك ولا لا . ولو كان فيه حاجة اشتريتها ينفع تعزم عليه منها زي الشوكلاتات يبقى عظيم .
- العمال في المولات : عمال الحمامات الي بيعزموا بمناديل أقبلها وابتسم في وشهم ، وعمال مناطق الأكل وعمال الأمن ، اعتبره تمن الكابتشينو زاد يعني مش هيحصل حاجة.

- عمال الأمن وحراس العقارات وأنت طالع الصبح ابتسم في وشهم ، الابتسامة صدقة ، ولو أنت راجع بالليل ومعاك حاجة تعزم بيها في البرد ده يبقى هايل جدا .

- عمال شركتك ، اعزمهم على أكل من الي بتاكله من وقت للتاني.

- الأطفال الي في الشارع وأطفال حراس العقارات وأي طفل حتى لو شكله من أسرة متوسطة ، محدش بقى قادر دلوقتي ومبقاش فيه طبقة متوسطة أصلا ، وزع عليهم شوكلاتات مش هتلاقي مصروفه يقدر يشتري حاجة منهم دلوقت خالص.
الناس اللى بيجو يكشفو غاز وكهرباء أو المحصليين , ممكن فى الصيف نديلهم كوباية ماية ساقعة أو حتى علبة عصير

- الستات شوية بليلة ، عدس ، حمص الشام وأنت خارجة في علبة بلاستيك هيفرقوا كتير مع الناس الي واقفة في البرد.

[Rena Jesus]

أفكار فعلا جميله
ربنا يبارك خدمتك يالولو

[walaa farouk]

ميرسي على مرورك الغالى رينا

[Mary Naeem]

مشاركة جميلة جدا

ربنا يبارك حياتك

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[walaa farouk]

ميرسي كتير على مروركم الغالى