|
 |
 |
 |
|
|
|
رقم المشاركة : ( 1 )
13 - 01 - 2016, 02:11 PM
|
|||||||||||
|
|||||||||||
|
فيس بوك ينفجر بسبب انتشارهذا البوست من ضابط شرطة الى حمدين صباحي
 رسالة رهيبة من ضابط شرطة الى حمدين صباحي اثارت موجة هائلة من التعليقات عبر الفيسبوك نترك لكم الرسالة رسالة من ضابط شرطة الى حمدين صباحي.. اتفرجت على اجزاء من حلقتك امبارح في العاشرة مساء...والحقيقه كده انا هعقب على شوية حاجات بسيطه ... سمعتك بتتكلم عن فض رابعه وانه مش عاجب جنابك واستخدمت العباره الساذجه الدارجه بتاعت ان الدم كله حرام وانك اتوجعت من اللي ماتو في فض رابعه وكنت تقصد الاخوان...انت حتى مذكرتش ان اول شهداء في فض رابعه كانوا 2 ضباط..منهم واحد كان لسه بينزل من المدرعه واول ما حط رجله عالارض جاتله رصاصة قناصه في راسه واستشهد في الحال وده كان الشهيد صاحبي شادي مجدي اللي علمني انا وضباط كتير يعني ايه رجوله وتضحيه..ولما كنت معاه في جبل الحلال ويلاقيني متضايق اننا مش بننزل اجازات كان بيهون علينا بضحكته وكلامه اننا لازم نستحمل .. انت بتطلب مننا ايه يا عم يا مناضل انت ؟...المطلوب ايه اللي يحصل وانت بتواجه اعتصام مسلح استخدم اكتر الاسلحه عنف...؟ هل لما القوات تلاقي 5 ضباط ماتوا جنبهم في اول نص ساعه واللي بدأ من الاخوان المسلحين المفروض يدخلو يدوهم جاتوه وسفن اب زي مانت عايز....اللي ميعرفش يقول عدس يا بيه...وانت مبتفهمش في الامن اصلا يبقى متتكلمش لان انا عمري ماشفتك حيادي انت طول الوقت متحيز لافكارك المتناقضه اللي واضحه لينا كلنا وواضحه ليا كمواطن قبل ماكون ضابط ....انت فشلت فكل حاجه. تقريبا واشطر واحد تعلق فشلك على اللي حواليك وعلينا اول ناس....دايما فكرة المؤامره مسيطرة عليك... شفت صورك ومقابلاتك مع قيادات وكوادر وشباب الاخوان اكتر من عدد الاصوات اللي انت خدتها في انتخابات الرئاسه...شفت انك كنت بتقول انك بتعارض نظام الرئيس الاسبق مبارك ولقيتك بترحب بتولي نجله جمال رغم انك كنت ضد التوريث...عمري ماشفتك بتتكلم عن دم عسكري مصري الا فتات المرات على استحياء وكانك متبني فكرة وحيده تدافع بيها عن افكارك السمجه بس....اتكلمت على اللي بتسميهم شباب ثورة وانهم معتقلين وزوار فجر وجو قديم اوي انت مش قادر تتحرر منه او تفكر بره الصندوق ... دافعت عنهم وجهلت ان في 750 شهيد و13000 مصاب نصهم عنده عاهات مستديمه من زمايلي ولا عمرك اتكلمت عنهم ولا احنا مستنيين كلامك عنهم لانه ميعنيناش وميساويش عندنا 3 سحتوت لان مهما اقول عمرك ما هتفهم يعني ايه الفرق بين الواجب والتضحيه...عمرك ماهتعرف ياللي بتتكلم عن المصالحه ان في ضابط هو الوحيد في فض النهضه الشهيد محمد عبدالعزيز كان داخل احد الخيم ولقى اسره اخوانيه مكونه من اب وام وولادهم وكان ممكن يصفيهم كلهم لو حب..لكن انسانيته اللي انت متعرفهاش منعته واداهم الامان يخرجو ومسافة ما اداهم ضهره الراجل الاخواني طلع سلاحه وضرب الضابط اللي نال الشهادة...هو ده العهد اللي انت بتتكلم عليه...انت متعرفش يعني ايه تدفن زميلك وصاحب عمرك وترجع تشتغل وتلبس التيشيرت بتاعه وتنزل بيه ماموريات وبردو تستشهد زيه ...ده الشهيد محمد السواح اللي بكلمك عليه واللي خد التيشيرت بتاع الشهيد احمد حجازي بعد ما دفنه...طبعا انت مش هتركز في اللي بقوله لانه عمره ما هيوصلك وده لاسباب كتير يمكن معانيها مفقوده عندك في وسط مؤتمراتك وبدلك وكرافتاتك وشعرك....انا عمري ماهنكر ان في سلبيات واوعى تفتكر اني بطبل لحد..لكن انا بدافع عن مهنتي اللي انت متعرفش عنها اي حاجه...انت فاكر نفسك انك لوحدك اللي مناضل...لااااا تبقى واهم وعايز تبص فالمرايا ....اوعى تنسى ان في ضباط شرطة وانا كنت واحد منهم وقفنا ضد الاخوان ونظامهم الفاسد...هتفنا بعلو الصوت ضد الظلم وانحازنا للشعب ومخوفناش...في الوقت اللي انت كنت بتماين حساباتك وموائماتك...اوعى تكون فاكر ان انت لوحدك المثقف لااااا تعالى اوريك كام ضابط معاه دكتوراه او ماجستير وكان بيذاكر في الشارع عشان معندوش وقت يذاكر فيه الا بعد او قبل خدمته...تعالى اوريك ضابط اسمه طارق عبدالوهاب فقد ايديه الاتنين وهو بيتعامل مع قنبله السنه اللي فاتت واهو عايش من غير ايدين عشان انت وافكارك تقعد ترازي فينا وتقرفنا وانت اصلا ملكش اي انجاز عالارض الا الكلام وابتسامتك الممله...تعالى اوريك لواءات اكبر منك قاعدين في الشارع بالعشرين ساعه ... واوعى تفتكر اني بطبل بردو لان انا اكتر واحد ضد الاعتماد عالعنصر البشري ....مسمعتكش بتتكلم عن اللي قتلو زمايلي ولحد دلوقتي فالسجون بيتحاكمو...انت اتكلمت بس عن مصلحتك واللي زي افكارك....انت دافعت عن اللي حرضوا علي قتلنا وخربوا في الشوارع وبتطالب الدوله تفرج عنهم..... سمعتك بتقول ان الجيش بيقوم بدور غير دوره...لولا الجيش اللي مش عاجبك كان زمانك بايع دهب بيتك وشاري بندقيه آلي وواقف تحت بيتك في احمد عرابي...اكتر مشاريع ناجحه بتطلع من ايد الجيش...وكتر خيره انه شايل حمل وقرف مؤسسات تانيه.... انت متعرفش حاجه عننا يبقى متتكلمش الا فاللي يخصك....ونصيحه من واحد سنه نص سنك...حاول تغير من عباراتك واسلوبك ونغمة احساسك بالفقير لان انت متعرفش عنهم حاجه زينا...احنا اللي بنتعامل معاهم في الشارع اكتر منك وعلى اد ما بنقدر بنتعامل انا وكتير بما يرضي ربنا او ضميرنا حتى في عز السلبيات اللي موجوده عندنا او بعض التجاوزات الفرديه اللي بتحصل واللي مقدرش انكرها واللي رافضها انا وكتير وبدليل ان ضباط الامن الوطني اللي اتهمو بتعذيب محامي اخواني محبوسين بحكم نهائي زيهم زي اي ضابط اتقدم للنيابه واتحبس في واقعه مشابهه وده حصل الايام اللي فاتت كتير ...بس طبعا عشان الموضوع مش على هواك فانت مش هتتكلم فيه وهتعمل هندي.... اخيرا وعشان متقولش اني مزقوق عليك لا سمح الله ...لو انت متعرفنيش او مشوفتنيش قبل كده ممكن تدخل عاليوتيوب او جوجل وانت تعرف انا بكلمك في ايه وانا مش بهري معاك في كلام مالوش لازمه او باحث عن شو...لا انا الحمدلله كنت عالارض ووقفت وساهمت في 30 يونيو وكنت بفضل الله اول متحدث رسمي منتخب من ضباط الشرطة في اول انتخابات على مستوى وزارة الداخلية في تاريخها والحمدلله فزت باكتساح ولعلمك كمان انا الحمدلله معايا 3 دبلومات وماجستير من اكبر الكليات وشغال في الشارع مش قاعد علي مكتب...بس الحمدلله انا عارف معنى الانتماء لوظيفتي وبخاف عليها من حد زيك كل همه يطلعنا سفاحين وجبابره وخلاص .... ويجهل اي تضحيات او بطولات لمجرد الدفاع عن افكاره الغامقه السطحيه... وهات ودنك..كلام في سرك...( الناس زهقت من تجار الكلام ومرتزقة الثورات...ربنا يكفيك شرهم ).. نقيب / هشام صالح 
|
 |
|
العرض المتطور