إلي كل حبيبة.. احذري هذا الكلام

[Mary Naeem]

إلي كل حبيبة.. احذري هذا الكلام

امبارح اتنين من صحباتى كلمونى كل واحدة حكت لى حبيبها قال لها إيه وهذا على أساس إن عقلى كبير وهعرف أوزن الأمور واكتشف إذا كان الشخص ده بيكذب عليها أم لا – جابوا منين الاعتقاد ده محدش يسألنى – المهم بعد ما كل واحدة صدعتنى ساعة و تلات تربع ساعة اكتشفت حاجة رهيبة إن معظم الجمل اللى المفروض ان كل حبيب بيقولها لحبيبته المغفلة إتكررت, وسبحان الله كأن الولدين أصحاب ولا كاتبين سيناريو المكالمة مع بعض ,,, فطبعا الحاسة الصحفية اللى بتنأح على طيرت النوم من عينى وقولت لازم اعرف السر.سألت 36 بنت مرتبطة عاطفيا عن أهم الجمل اللى بيقولها حبيبها و اللى بتعلق فى دماغها ,,, وكان شكى فى محله طلع ولاد الذين بيضحكوا على البنات الغلابة وحافظين كام جملة بتتكرر و واللى بيختلف بس هو اسم المغفلة,,, فقلت لازم اقول لكم اشهر الجمل اللى كل الواد حفظنها و بيسمعوها للبنات اللى مختومة على قفاها لامؤخذة,, فإلى كل قفة هانم فنجلى عينك واقرأى بتركيز....
-حبيبتى انتى عارفه أنا مش بحب حركات الشباب السيس وعمرى ما أتكلمت مع حد براحتى غيرك" وتلاقيه بيرتاح لطوب الارض"
- يااااه يا حبيبتى أنا حاسس انى أعرفك من زمان
"وهو تلاقيه مش فاكر أتعرف عليها فين من كتر البنات اللى بيظبطهم"
- حاسس إن فيكى حاجه غريبة غير كل البنات
"طبعا عندها شوية هبل زيادة عشان مصدقة الكلام الفاضى ده"
- مش ملاحظة إن تفكيرنا زى بعض ,, احنا أكيد مخلوقين لبعض "اكيد دى البنت رقم 100 اللى بيقولها كده ,,وكأًن كل بنات الدنيا مخلوقين عشانه"
- حبيبتى انتى اول حب فى حياتى وانا حاسس انى أتولدت يوم ما قابلتك
"على أساس إن الست الوالدة كانت حامل فيه 20 سنه وولدته قبل ما يقابلها بساعتين"
- يااه يا حبيبتى انتى تؤمرى وانا أنفذ و لو عايزة لبن العصفور اجبهولك
"فى المشمش"
- حبيبتى الطقم ده تحفه عليكى بس متلبسهوش تانى عشان بتبقى حلوه وانا بغير " تلاقيه مش طايقه اساسا"
- هكلم باباكى أول ما اكون نفسى
"موت يا حمار"
- عايز اشوفك كل يوم كل ساعه كل ثانيه
" عشان يعيش أدام الشلة"
- حبيبتى افتكرى دايما انى لما بحب بحب بجد وانا حبيتك بجد من اول ماشوفتك وكنت بدور عليكى من زمااااااان "قديم قديم يعنى"
- انا علاقتى بيكى محدش يعرفها غيرى و غيرك و ربنا لانك بقيتى كل خصوصياتى
"اكيد اللى يعرفوا يا دوب اخواته و اصحابه و جيرانه وصحاب صحابه و الاهل و الاقارب فى سمنلوط"
- ياه لما بشوف رقمك على الموبيل قلبى بيتنفض "طبعا من الخضه انها تكون فأسته"
-حبيبتى عايز صورتك عشان قبل مانام اشاهد فى جمالك واحطها تحت المخده
"عشان يا قفة لما تتخانقوا يهددك بيها"
- عارفه يا حبيبتى انا اصلا مش بفتح الماسنجر إلا لما بتكونى موجودة اصل النت من غيرك ممل جدى"يقصد مش بيفتح البلوك عنها إلا لما تكون هى بس اللى اون لاين عنده"

إلى كل بنت بتحب.. اقرأى الجمل كويس وبتركيز وشوفى بقى اتقال لكى كام واحدة منها؟؟؟؟؟