السؤال اللي بنسأله وإحنا مشيين تايهين

[walaa farouk]

فين ربنا؟
السؤال اللي بنسأله وإحنا مشيين تايهين
ومش شايفين علامة تطمّنا.

بتدور على ربنا وعايز تشوف إيده… تشوف حضوره
… تشوف تدخل واضح يقولّك “أنا معاك”.
بس بتدور فين؟
في الزحمة؟
في الضوضاء؟
في الناس اللي كل واحد فيهم متلاهي في همّه؟
لا… ربنا مش بيتشاف وسط الأضواء العالية.

ربنا بيتشاف في اللحظات اللي بتكسرنا.
في التراخي اللي بعده انهيار…
في القلق اللي محدّش فاهمه…
في الباب اللي يتقفل وراه ألف باب…
هناك، في الضلمة… تلاقيه بينور فجأة.
في العقدة اللي ما لهاش حل…
تلاقيه بيحلّها بطريقة عمرك ما حسبتها.

ربنا في كل غلبان ومكسور ومحتاج كلمة تطبطب عليه.
ربنا جنب سرير مريض الأطباء وقفوا قصاده مش فاهمين
… وهما مش فاهمين، بس هو فاهم.
ربنا في الخوف… في التجربة…
في اللحظة اللي بتنهار فيها، تلاقي إيده بتمسح عليك.

ربنا في كلمة حلوة… في نظرة حنان…
في جبر خاطر بسيط أنت فاكره قليل وهو كبير عنده.
ربنا في الخير اللي بتعمله وإنت مش مستني مقابل.
ربنا في الرحمة… في الستر…
في كل مرة تقول: “يا رب” من غير صوت.

أقرب مكان تلاقي فيه ربنا…
قلبك.
لما تفتحله… لما تسيبله مساحة…
لما تخليه ساكن جواك قبل ما تدور عليه برا.

متدورش بعيد…
ربنا مش مختبئ.
ربنا مستني ترفع عينك بس في الاتجاه الصح