[Mary Naeem]

رثاء يدمي القلوب من والد الشهيدة
بنعيكى يا مريم يا بنتى .. و انت قمراية بريئة زى الملاك
رايحة الفرح بفستان فرحك ..عرسك .. عصفور بيغرد للحرية من على شباك
بنعيكى يابنتى من غدر سجين جبان.. اخوان.. قطفك و انتى عودك اخضر .. املس من غير اشواك...
بنعيكى يا بنتى من اللى جرالك من كلب سعران من خسيس كان عامل فيها على المنصة عتريس بس من جبنه اتحامى فى يوم ورا نسوان .. بنعيكى من تاجر دين .. من قلب وحش سفاك
بنعيكى يا بنتى لما وقعت علبة الملبس من ايديك على الارض قبل ما تاكليها .. لو عشت كنت نضفتيها .. بس ملحقتيش يابنتى .. اتغرقتى فى دمك .. صرخت امك .. قتلوكى و لا انتش طرف فى عراك
مش عارف يا قلبى لما انضربتى صرختى و لا اتخضيتى فسكتى سكتة موت .. اتوجعتى .. و لا اتحررتى و طرتى فى لحظتها مع ملايكة تسبح فى ملكوت .. اديكى يا مريومة وصلتى ..مش كنت بتسالى كل يوم ربنا ..انت فين ؟! عاوزة اشوفك عاوزة اطلع لك سماك !!
ياريتك يابنتى كنت خدتى من عمرى و عشتى .. صدقينى ما يغلى عليك عمرى و عيشتى .. انا اب و عارف وجيعة ابوكى لما يرجع كل يوم البيت راح يلاقى مين يقوله اتاخرت ليه ياسى بابا ... انا مستنياك
عارفة يا مريم .. انتى يمكن ما تعرفنيش بس انا عارفك .. انتى بنتى .. انتى امل بكرة بسمة بريئة بنشحتها .. حلم جميل بنصدقه .. رقعة فى زمن قبيح بنلفقه.. دفا فى برد ليل بنسرقه .. كل بنت ادك فى بلدى يا مريم هى بنتى .. و ياريتك يا مريم لا رحتى و لا على كلاب السكك بنتى .. كانت الايد اللى اتمدت عليك انقطعت قبل ما تسرق ضحكتك .. قبل ما تنكسر لعبتك .. عرفتينى بقه .. اوعى لما اجيلك تقولى مش عارفاك
ارتاحى يا بنتى و غمضى عيونك العسلية .. حلمك اتحقق .. فراشة طايرة .. مركب معدية .. سمكة فى مية .. روحك هايمة عليت فوق المنارة .. نزلت الستارة .. و اتكتبت النهاية بسرعة بعد البداية .. بس حيفضل دمك يصرخ فى وش اللى قتلك ليوم الدين .. مديناك
متخافيش يا حبيبتى .. حاكلك عصافيرك .. حرسم بالوانك رسمتك .. و اشرب المية لقطتك .... خلصت لقطتك .. سكتت ياروحى كلمتك .. بس حتفضل جوايا .. عزايا .. عارفة يا مريومة لما دموعى تنزل .. حبص ع السحاب و اشاورلك .. مش شايفك بس حسمعك و انت بتقولى لى غمض عينك .. شايفاااااااااك
قلم نبيل شحاتة 22/10/2013