[jajageorge]

[SIZE="6"وشدّد يونس مخيون، عضو الجمعية التأسيسية، عضو الهيئة العليا لحزب النور (السلفى)، على أن انسحاب المسيحيين من «التأسيسية» سيجعلنا نعيد النظر فى المواد التى توافقنا عليها بما فيها المادة الثالثة التى تنص على أنه يحق «للمسيحيين واليهود الاحتكام لشرائعهم فى أحوالهم الشخصية» (من قصيدة تهديد ووعيد ليونس بن مخيون السلفى). حلمك يا شيخ مخيون، بالهوادة يا مولانا، الحكاية مش قفش، اللى ينكسر يتصلح، واللى ينسحب يرجع، خليك بارد، السلفيين ميهددوش المسيحيين كده، الدستور فيه كده وكده وكده، كده تشريع، وكده تسليك، وكده توليع، اعتبر يا أخا الإسلام لقول الإمام البنا رحمه الله: «نتعاون مع بعضنا فيما اتفقنا عليه، ويعذر بعضنا بعضاً فيما اختلفنا فيه»، يعنى نتراضى، كده شريعة، وكده شرائعهم، وبالحسنى وزيادة. «يا تحلبى يا اكسر قرنك»!، ليست مفتتحاً مناسباً لدستور توافقى، تنفع لدستور تناطحى، دستور كسر القرن، فكرة «باب الدستورية يفوّت جمل» تنتهى عادة بإغلاق الباب عليكم من بره، صعب تخرجوا بدستور على العلن مفيهوش «زينب»، أقصد المادة الثالثة (مادة شرائعهم)، كتابة الدستور بلىّ الذراع لا تسوى سطوراً. الملافظ سعد يا دكتور!، وتغلظ فى القول فيخشى الذى فى قلبه مرض!، كان زمان وجبر، المصريون وفى قلبهم المسيحيون ودّعوا الخشية، مخيون جالكم خبّوا عيالكم محل تندر مغتاظ قوى من انسحاب المسيحيين، طيب وانسحاب جماعة المدنيين، لا ترى فى انهيار «التأسيسية» سوى انسحاب المسيحيين الستة، الغلط مش عليك، الغلط راكب المدنيين قبل المسيحيين، غلط اللى مشوا مشوار الباطل وهم على باطل، وما بنى على باطل فهو باطل، ومعلوم حداية الإخوان لا تلقى بالكتاكيت. المدنيون كانوا فاكرينها نزهة خلوية، عندما تخرج لاصطياد الذئاب توخَّ الحذر من غدر الصحاب، بالتراضى يا مخيون، التهديد ما يكُلشى، عيد وزيد واشطب فى كراستك، بجرة قلم، اشطب المادة الثالثة، وارجع البصر هل ترى من فطور؟! ولا يهمك، إن شاء الله تشطب المسيحيين من السجلات الرسمية، أنتم لا ترون إلا أنفسكم وما تصنعون، البلد خلت إلا منكم، بلد اللحى إن طالت قصرت بناطيلها، نامت نواطيرها عن ثعالبها، نواطيرها (جماعة المنسحبين) صحوا فجأة من سُباتهم على حادثة دستورية مروعة، كانوا فى سابع نومة، زى خفير المزلقان. مخيون راسه وألف سيف، كله إلا المسيحيين، ينسحبوا كلهم ويبقى المسيحيون قعوداً وعلى جنوبهم، يحمدوا ربهم أنهم ممثلون أصلاً، وكمان ينسحبوا، طيب لا مادة ثالثة ولا احتكام لشرائعهم، بلّوا المادة التالتة واشربوا ميتها، وإن عدتم عدنا، وعلى المنسحب تدور الدوائر، ولو طوّلتم فى الغيبة، المبادئ ستصير «أحكام»، وانتم عارفين الأحكام!!.

المصدر : المصرى اليوم
] [/SIZE]