فيه شوية حروب مش بتروح مع الوقت..
Don't just go..
أوقات بندخل تحت ضغوطات أو مشاعر أو أفكار
وبنحس انها كلها حاجات هاتروح لوحدها مع الوقت.
وبنكتشف ان السواد مش بيروح. ده بيزيد! الاكتئاب بيزيد.
الخوف بيزيد. الضغطة المادية بتزيد. الوضع بيزداد سوء.
والمشكلة ان احنا بنتعود على حالة الضغط، وكل شوية يزيد،
ونقول وقت وهايعدي. ومابيعديش.
فيه فعلا حاجات بتعدي لوحدها، لكن فيه حاجات تانية اللي وراها أكاذيب العدو
أو هجماته مابتعديش. بالعكس، كل ما بتسمح بيها
وتتساهل معاها بتتعود عليها وتكون حمل بايخ على ذهنك ومشاعرك وقلبك، وبتزيد.
يمكن حتى تكون نسيت شكل الحياة من غير التقل ده،
لأنك اعدت تصبر نفسك بانه وقت وهايعدي. لكن.
يمكن يكون البوست ده يفكرك ان ليك الحق والسلطان في المسيح يسوع
انك تنفض من على حياتك كل أحمال اتعودت عليها.
لأن هو ادانا السلطان أن ندوس الحيات والعقارب وكل قوات العدو.
الحل.. انك تاخد وقفة جادة مع الحاجات اللي طولت أكتر من اللازم.
وقفة سلطان وإيمان. وقفة من الصلاة والصوم. وقفة من إعادة ترتيب الأوراق مع الرب.
يمكن تحتاج تطلب صلاة وتعضيد من اخواتك.
يمكن ترجع تلتزم في اجتماع قوي مليان بحضور الرب ومسحته اللي تتلف الأنيار.
ترجع لأوقات طويلة في الكلمة تغسل مشاعرك وذهنك.
يمكن الحرب ماتتحسمش في أيام قليلة
، بسبب أنك سبت الظلمة تتغلغل في أعماق نفسك وذهنك
. لكن المهم أنك تبدأ برفض الظلمة والإيمان في قوة النور.
أصلي انك ترجع تختبر فرح وسلام وقوة وتعضيد الروح القدس.
أصلي انك تمشي بجدية في طريق حرية من كل أثقال العدو. فلا تكون إلا فرحًا.
٣ أَكْثَرْتَ الأُمَّةَ. عَظَّمْتَ لَهَا الْفَرَحَ. يَفْرَحُونَ أَمَامَكَ كَالْفَرَحِ فِي الْحَصَادِ.
كَالَّذِينَ يَبْتَهِجُونَ عِنْدَمَا يَقْتَسِمُونَ غَنِيمَةً. ٤
لأَنَّ نِيرَ ثِقْلِهِ، وَعَصَا كَتِفِهِ، وَقَضِيبَ مُسَخِّرِهِ كَسَّرْتَهُنَّ كَمَا فِي يَوْمِ مِدْيَانَ. (إشعياء ٩: ٣، ٤)