[Mary Naeem]

انت فى عالم فُتحت فيه الازمان



فكرة الموت صعبه جدا ، تخيل إنك فجأه ماتبقاش موجود فى العالم ، لا صديق ولا حبيب ولا أى حد معاك ، مجرد التأمل فيها الدم ينشف فى العروق ..
تخيل جسدك اللى مهتم به وبتغذيه وبتشتريله احسن لبس فجأه يترمى فى حفره تحت الارض متر فى متر ويبقى وجبه دسمه للدود ..
فلوسك وبيتك حد غيرك اللى بيستمتع بيهم سواء اولادك او احفادك ..
منصبك فى الشغل حد تانى مسكه ..
نيجى بقى لدورة حياه ما بعد الموت ، مكان الانتظار والحساب وجيوش الملائكه اللى قابضين الروح وانت ولا حول لك ولا قوة مالكش حق حتى تدافع عن فعل خطأ عملته ..
انت واقف قدام ملك الملوك ورب الارباب فى محاكمه سمائيه مُهيبه ..
وشريط حياتك الخفى والظاهر حتى افكارك معروض لكل البشريه ..
شكلك هايكون ايه قدام الصديق اللى غدرت بيه ولا الحبيب اللى خونته ولا الضعيف اللى كلت حقه غدر !!
جاء وقت الحساب ودفع كل الفاتوره بالكامل ..
حكم نهائى بدون نقض ولا استئناف ولا محامى يدافع عنك
اعمالك الصالحه فقط اللى هاتشفعلك اللحظه دى .
انت متخيل ...!!
احساس بشع ان يكون الحكم النهائى بالتعذيب الا نهائى ..
مافيش زمن ولا وقت ولا ساعه ولا حتى راحه
انت فى عالم فُتحت فيه الازمان ...