[Mary Naeem]

عيل صغير كان مع مامته فى الشارع الساعه حوالى ١٠ بالليل ، الولد بيقول لمامته نفسى فى شبسى قالتله احنا مش معانا غير عشره جنيه ، هانجيب بخمسه فول نتعشى بيها والخمسه التانيه هانجيب بيها كيلو خضار بكره عشان نتغدى به ..
قالها ياماما نجيب الفول والشبسى انهرده وبكره ربنا يرزق انتى مش دايماً بتقولى كدا ..
قولتله ايوه يا حبيبى بس احنا لازم نكون حكماء فى المصاريف ماينفعش اصرف كل اللى معايا واقول ربنا يكرم ..
قالها يا ماما فاكره حكايه العصفوره اللى بتحكهالى لما عصفور نزل عند راجل بتاع غله كل وشبع وطار من غير ما يشيل حاجه معاه ، خلاص احنا انهرده نكون عصافير ناكل ونشبع وربنا يكرم بكره بقى ..
الام بصت لابنها كدا وضحكت وقالتله وانا مش هاكسفك عصفور عصفور ياسيدى ..
وبالفعل الام دخلت السوبر ماركت وقالت لابنها يختار كيس شبسى ، وهى واقفه جالها مكالمة تليفون على ما خلصتها لقيت ابنها راجعلها وفى ايده عشرين جنيه ..
الام اتفاجأت وقالتله ايه ده ؟؟؟ جبتها منين !!!
قالها يا ماما مش انتى دايماً بتقوليلى لازم نساعد بعض ، الراجل العجوز اللى فى العربيه اللى هناك ده قالى تعالى ساعدنى وشيل معايا الاكياس دى وساعدته ، وقالى انت ولد شاطر وعطانى ٢٠ جنيه بس انا ماكنتش راضى اخدها راح قالى امسك ماتتكسفش ده رزق وربنا باعتهولك 😍😍..
لوقا 1: 37
لأَنَّهُ لَيْسَ شَيْءٌ غَيْرَ مُمْكِنٍ لَدَى اللهِ».