[walaa farouk]

حاجة طريفة وغريبة حصلتلي
كان عندي مجموعة صنايعية شغالين بيعملوا شوية حاجات
في البيت من تركيبات وصيانة
وكان في واحد قالي الشغل مش مضبوط اللي هنسلمهولك .. طبعا أنا اضايقت بس معنديش وقت ولازم الحاجات تخلص وتتركب وبعد وقت وتليفونات ومتابعة عايزين نعرف مين اللي غلطان العميل اللي هو أنا ولا الشركة المسئولة عن التركيب اتأكدنا أنه الشركة هي اللي غلطانة
في رفع المقاسات بس أنا بصراحة شوفت تعب الناس والوقت الضايع
فقولتلهم مش مشكلة ركبوا الحاجة مش هتفرق
بس نشوف الموضوع بعدين وفعلا ابتدوا تركيب
وهما بيركبوا الحاجة أثناء شغلهم زي ما يكون الحاجة مش راضية تركب وعمالين يحاولوا بس منفعش خالص فسمعت الصنايعي
بيقول العميلة دي فيها شئ لله بصراحة استغربت
وسألته أنت بتتكلم عن مين قالي عن حضرتك باستغراب
وقال بقى انتي راضية ومتنازلة عن حقك والشركة هي اللي غلطانة
بس ربنا عايز يحفظلك حقك وتاخدي حاجة سليمة
ومش هينفع تركب .. بصراحة وقفت شوية كده ساكتة
وجوايا صوت بيقول يارب انت بتحفظ حقنا
حتى لو احنا مستغنيين عن الحق ده
كام مرة يارب تغضينا عن حقوقنا ورجعت لينا أضعاف
كام مرة يارب دافعت عننا واحنا ساكتين
كام مرة حفظت حقنا وحتى احنا مش عارفين
انه لينا حق ضايع أو مسلوب فعلا إلهنا إله الحق وبيحفظ حقنا حتى لو متكلمناش وحتى لو انظلمنا وكم من حد ممكن
يكون بيقرا الكلمات دي وشاف ظلم او حقه ضاع منه مادي
او معنوي عايزة أقول ليا وللكل انه إلهنا نطمن معاه
علشان هو إلة الحق وابداً ما بيسمح بالظلم
وحتى لو العالم ظلمنا هيرد الظلم عنا ويردلنا حقنا أضعاف …
أفكار العالم اني أخد حقي بدراعي فكرة شيطانيّة أوقات بنميل اننا ناخد الحق والعالم يقول ( اخد الحق حرفة)
لكن مين ياخدلي حقي مين اللي يردلي حقي هو ده التحدي علشان كدا هنعيش طول حياتنا نصارع في الحتة دي أخد حقي
أو اسكت اطلبه ولا هما هيفهموا ويدركوا انه ليا حق
… ولكن احنا كأولاد الله لينا حق في يسوع يرد كل حق
ودي ثقتنا فيه لانة إله الحق وباحب أقول قوي دايماً الجملة دي
( إلهي حقاني بيحفظ حقي )
كل ما بارددها جوايا بطمن وبشعر بسلام
وببقى فخورة قوي بالجملة دي وانا بلرددها في قلبي
.. انت او انتي كمان رددها في قلبك معايا
( إلهي حقاني بيحفظ حقي )
.. نشكرك يارب لان حقوقنا معاك متصانة ..