[Mary Naeem]

زمان وانا فى إبتدائى، أمى كانت لازم تخلينى أفطر كويس قوى قبل مانزل من البيت ، وده كان مشكله كبيره ليا أتعلمت بسببها أعظم درس فى حياتى..
ساعة الفسحه ، كنت الاقى زميلى اللى جنبى طلع ساندوتشاته وبياكلها وهو مستمتع بيها جدا جدا ..
وانا أطلع ساندوتشاتى الاقيها بارده ومالهاش طعم وماتفتحش النفس ، اقوم شايلها زى ماهى فى الشنطه واقعد مضايق ..وفضلت على الحال ده كتير ..
لغاية ما فى يوم مدرسه مستحيل أقدر أنساها ، كانت بتتكلم مع كل واحد فينا كأننا كبار ، ودايماً مبتسمه ، وبتعاملنا زى ما تكون أم لكل طفل فى الفصل ..
المهم فى يوم كنت قاعد فى الفسحه مضايق وشافتنى المدرسه دى ..
جات وقالتلى ماللك قاعد لوحدك ليه ؟؟ انت مامعكش ساندوتشات تاكلها زى زميلك اللى جنبك؟؟
قولتلها معايا بس انا ساندوتشاتى مش حلوه زى ساندوتشاته ..
قامت المدرسه قالتلى يعنى انت نفسك تبدل مع زميلك ..
بصيت لها بكل سعاده وانا بقولها ياريت ..
قالتلى ماشى ..
راحت أقنعت زميلى انه يبدل معايا ساندوتشاته ..
بالفعل زميلى وافق ..
لكن ساعتها حصلت حاجه غريبه ..
لما جيت اكلت ساندوتشات زميلى ، لاقيتها عاديه بردو ومالهاش طعم مش زى ما كنت فاكر ..
المدرسه لما لاقيتنى سيبت السندوتشات تانى ..
قالتلى ..
انا حبيت أثبتلك ان العيب مش فى الساندوتش اللى معاك ، العيب جواك انت ..
طول مانت شبعان مستحيل تحس بنعمة الساندوتش اللى معاك وتلاقى متعه لما تاكله ..
زميلك عشان بياكل وهو جعان فعلا ، بيلاقى الاكل حلو جدا ، وانت بتلاحظ انه مستمتع قوى بأكله ..
عزيزى القارىء ..
مستحيل تحس بقيمة النعمه اللى معاك طول مانت مش حاسس بقيمتها ، هاتفضل طول حياتك عايش فى تعاسه وفاكر ان كل الناس معاهم حاجات أحسن منك وانت الوحيد المظلوم وتعيش فى عتاب شديد مع ربنا وفاكر انه ظالمك ..
صدقنى لو بدلت حياتك مع حد ساعتها هاتحسده على النعم اللى كنت فيها ..
بنعرف بقيمة اللى معانا لما نتحرم منها ..
انت غنى باللى معاك..