[walaa farouk]

حاسس إن نفسك "مُرة"؟
حاسس إن صلاتك مش مسموعة وطلباتك مش مُستجابة؟
حاسس إنك محتاج تعاتب ربنا!!

دا بالظبط اللي حصل مع القديس حبقوق النبي
، اللي بتحتفل الكنيسة النهاردة بعيد نياحته.
حبقوق عاش في فترة كانت مليانه بالشر،
ومقدرش يستحمل فراح يصرخ لربنا،
ويعاتبه عتاب شديد إنه شايف الشر ومبيعملش حاجه
(في وجهة نظره الإنسانية)!
قال لربنا: حَتَّى مَتَى يَا رَبُّ أَدْعُو وَأَنْتَ لاَ تَسْمَعُ؟
أَصْرُخُ إِلَيْكَ مِنَ الظُّلْمِ وَأَنْتَ لاَ تُخَلِّصُ؟ (حبقوق 1: 2)

حصل ايه وقتها؟ ربنا غضب وعاقبه؟
ربنا قاله: "انت إزاي تتهمني بالشر اللي البشر بيختاروا
إنهم يعملوه بإرادتهم"؟
هل قاله: "انت نسيت نفسك ولا ايه يا حبقوق"؟ ... إلخ
أبدا.. إنما بعد ما سابه يشرح كل اللي جواه
ويشكي كل وجعه في الأصحاح الأول،
ردّ عليه وجاوبه بكل رقه في الأصحاح التاني وقاله:
اطمن أنا عارف بعمل ايه وعارف الأزمنة والأوقات المناسبة!
علشان ينتهي السفر في الأصحاح التالت
ببهجة وفرح وسلام حبقوق اللي قال:
فَإِنِّي أَبْتَهِجُ بِالرَّبِّ وَأَفْرَحُ بِإِلهِ خَلاَصِي.
اَلرَّبُّ السَّيِّدُ قُوَّتِي، وَيَجْعَلُ قَدَمَيَّ كَالأَيَائِلِ، وَيُمَشِّينِي عَلَى مُرْتَفَعَاتِي. (حبقوق 3: 18 - 19)

بيقول القديس مار إسحاق السرياني:
"الصلاة مفتاح لخزانة كنوز الروح،
ومسكين من يحمل هذا المفتاح
ولا يدخل إلى كنزه ليقطف ثمار الروح المُعدّة له"
. شوف الصلاة عملت أيه مع حبقوق النبي وغيرته إزاي
.. وتعالوا نصلي على طريقته
.. تعالوا نشكي وجعنا وألمنا وكل تعبنا لربنا ..
وهتشوفوا هيعمل معانا أيه!

🌿