[walaa farouk]

لفت نظري وسط أحداث الصلب والقيامة تكرار ذكر "مريم المجدلية"
وقعدت أدور على تفاصيل عنها وأفكر إزاي {حبت} الرب كل ده
في كل الأحداث الوحي بيقول أنها كانت أول واحدة
وأول اسم يذكره في كل الحاجات دي:
- أول واحدة الوحي بيذكر أنها خدمته
- أول واحدة صرفت من أموالها على خدمة الرب
- أول واحدة أتقال اسمها عند الصليب
- أول واحدة أتقال اسمها عند الدفن
- أول واحدة راحت الفجر والدنيا لسه ضلمة عند القبر
- أول واحدة شافت القيامة
- أول واحدة بلغت التلاميذ
- أول واحدة ظهر لها المسيح
- أول واحدة شهدت عن القيامة
أول واحدة في حاجات كتير أوي جميلة

قعدت أقارن بينها وبين التلاميذ كانوا عايزين يكونوا هما الأول في إيه!
فاكر... الأول في العظمة! والأول في السُلطة! الأول في المركز.....

قعدت أقارن بينها وبيني {أنا} عايز أكون الأول في إيه؟!
لقيت المسافة بعيدة أوي

المجدلية أحبت الرب كتييير أوي
وعشان كده كانت عايزة دايمًا تبقى قريب منه أوي.
المجدلية شفاها من ٧ شياطين كانوا معذبين حياتها.
عشان كده وهبته كل حياتها!

أنا بصلي ليّ وليك النهاردة أننا نحب الرب حب المجدلية
أننا نبقى عايزين نبقى الأول في الحاجات اللي فوق دي
نختبر عمق وقرب علاقة معاه نبقى فيها الأقرب والأول جنبه