[walaa farouk]

لسه بيعمل معجزات🤩
كنت بعزف فى الكنيسة، فجأة بدأت أحس إني مش قادره أميز الأصوات بوضوح،
للدرجة اللي فيها مش سامعة صوت البيانو اللي بعزف عليه.
ده غير احساس بعدم إتزان رهيب، اتوترت جدا وخوفت، وحددت ميعاد مع دكتور متخصص.
بعد الكشف والفحوصات قالي إني بعاني من مرض مزمن بيصيب ٢٠٪ من الستات على مستوي العالم.
وللأسف فقدت تماماً السمع فى وداني اليمين وقالي إن وداني الشمال متأثرة
كمان بشكل كبير وإن الحالة مش مطمئنة أوي.
-سألته بشغف بس أكيد فيه علاج صح؟
اتصدمت لما قالي أنه للأسف المرض ده ملوش علاج جذري
لكن هيديني شوية أدوية تخفف بس من الأعراض.
رجعت البيت وأنا فى حالة إنهيار وعندي علامات استفهام كتير ملهاش إجابات.
-اشمعني أنا؟
-طب ليه وأنا بحبك وبخدمك؟
-طب هل هتدخل؟
بعد كام يوم صحيت من النوم وأنا مش سامعة أي حاجة بأذني اليسري كمان.
إيه ده مش مصدقة اللي بيحصلي ده وليه حالتي بتدهور بالسرعة دي كمان.
في اليوم ده إسودت الدنيا كلها في وشي، ركعت وأنا بصرخ لربنا
وبقوله الطب معندوش علاج طب وإنت يارب معندكش حل لحالتي إنت كمان؟؟؟
وفى عز خوفي ويأسي سمعت في روحي كلمة ((متخافيش صدقي فيّ))،
مكنتش فاهمه حاجة ولا عارفه اتصرف إزاي.
وكل ما أصلي اسمع نفس الجملة، مكنش سهل عليا أبداً خصوصاً إن مكنش فيه أي تحسن.
لكن قررت أتحدى نفسي وأصدق فى كلمة ربنا ليا حتي لو كان الواقع بيقول غير كده.
وبعد شهر ونص اختبرت شفا معجزي لوداني الإتنين ووقفت تماماً كل أعراض المرض.
أيوة اتشفيت وده غالي عليا اوي لكن كمان اتعلمت درس بعمري كله.
اتعلمت إزاي اصدق فى إلهي وأسَد وداني عن كل واقع مُحبط ضد وعد الله لي ❤️
قصه_حقيقية