[walaa farouk]

عديت في وقت صعب وكنت باصلي وباطلب الله ...
وماكنش بيحصل حاجة!!
فضلت أصلي وأطلب الله أكتر ...

وبرغم إيماني كنت باسأل:
يارب أنا متأكد إنك بتسمع صراخي بس هترد إمتى أنا تعبان !!؟

ووقفت قدام مشهد بارتيماوس الأعمى يقول الكتاب
"فَلَمَّا سَمِعَ أَنَّهُ يَسُوعُ النَّاصِرِيُّ، ابْتَدَأَ يَصْرُخُ
وَيَقُولُ: «يَا يَسُوعُ ابْنَ دَاوُدَ، ارْحَمْنِي!» (مرقس ١٠: ٤٧)
فضل يصرخ لدرجة أن الناس بدأت تسكته
لكن هو فضل يصرخ أكتر لحد ما يسوع وقف وقالهم نادوه يجى..
بعد صراخ كتير جم قالوله: ثق! قم! هوذا يناديك..

مع إني عارف ومتأكد إن يسوع كان يقدر يشفيه بلمسة
وهو ماشي فى السكة، بس باستغرب ليه يسيبه يصرخ
ويبعد وبعدين يندهله!

حسيت إن المشهد جه في إعلان وتكريم للأعمى دا،
لما السيد العظيم يقف ويوقف كل الزحام
وينادي عليه كأنه بينده عليه وبيكرمه على مسرح كبير..
الناس كلها ركزت ووقفت للراجل اللي يمكن جه وقت صعب
عليهم فيه أو ضحوا واتريقوا عليه أو حتى سرقوه ...
وفى لحظات الكل ساكت سأله يسوع عايز إيه؟؟ قاله أبصر
وكان الرد "إيمانك قد شفاك"
اعتقد الناس كلها سقفت وفرحت ...
وهو حس بسعادة يمكن كان أول مرة يحسها..
صراخه وإيمانه هما المعجزة ..
كان شفاؤه إعلان إيمان وإعلان مجد ليسوع وسط الجموع..

مهما طلبت وصرخت اتأكد هو سامعك وبيقولك " ثق! قم! "