[Mary Naeem]

رباعيات


إخوتي الشباب، جاءت ردود أفعالكم مُشجِّعة، ومحفِّزة
على الرباعيات التي نُشرت في أعداد سابقة من مجلتنا المحبوبة
“نحو الهدف”؛ فكانت كلماتكم ورسائلكم حافزًا جديدًا،
لكتابة سلسلة جديدة من الرباعيات أرجو أن يستخدمها
الرب لمجده في حياتنا.

١. معنى الشباب

الشباب يعني المغامرة والاكتشاف

يعني الحياة باختلاف

يعني التشكيل الإلهي

زي الطينة في إيد خزاف

٢. الشيوخ والشباب

الشيوخ ويا الشباب

ينفعوا يبقوا صُحاب

الشيوخ بالمشورة

والتنفيذ، على الشباب

٣. اقتراح

شباب، عندي ليكم اقتراح

استغلوا وقت البراح

اقروا كتير، صلوا كتير

وزي يوسف، عيشوا النجاح

٤. شيخ عجوز

شيخ عجوز وشعره شاب

بس بيحب الشباب

لما سألته عن السبب

قاللي: باعيش الكتاب!

٥. عادات

في الشباب، بنتعلم حبة عادات

منها المفيد، ومنها اللي بيعمل مشكلات

صلي كتير، وصوم كمان

واتعلم تهرب م الشهوات

٦. الشيطان

الشيطان شاطر، مكَّار

يرمي السم في الأفكار

ويخليك تايه، متحير

ما بين السما، والخوف م النار!

٧. كلام الله

وأنت بتقرا كلام الله

صدَّق إن الكلمة حياة

صلي بيها، وردِّد فيها

ها تحِلّ الفرحة، بدال الآه

٨. سر التعاسة

عارف إيه سر التعاسة؟

مش في الفشل وقت الدراسة

أو في قلة الفَرَاسة

السر، في عدم القداسة

٩. اتنين شباب

اتنين شباب

واحد بعيد والتاني تاب

جالهم مرض خطير مميت

الأولاني مات بيرنم، والتاني مات م الاكتئاب

١٠. صاحبك

صاحبك اللي يخاف عليك

وللسكة الصح يناديك

مش اللي يعلمك الغلط

وفي سكة الشر يودّيك

١١. عيش المسيح

عيش زي ما عاش المسيح

ما تقولش: صعب ومش صحيح

لو قضيت ساعات وياه

ها تعيش وقلبك يستريح

١٢. اتنين صُحاب

اتنين صحاب قالوا ها يعيشوا الحياة

واحد عاشها مع المسيح، والتاني غيّر الاتجاه

واتقابلوا بعد سنين طويلة

لقاء البسمة، ويا الآه